Հայաստանում մամուլում տեղեկատվություն հրապարակելու միջոցով քաղաքացիների ծանուցման մեխանիզմը պետք է ամբողջությամբ փոխարինվի էլեկտրոնային համակարգով։ Այս մասին մարտի 18-ին ԱԺ պետական-իրավական հարցերի մշտական հանձնաժողովի նիստում հայտարարեց արդարադատության նախարար Սրբուհի Գալյանը՝ «Ինտերնետով հրապարակային և անհատական ծանուցման մասին» օրենքում և հարակից օրենքներում փոփոխություններ կատարելու մասին օրինագծերի փաթեթի քննարկման ժամանակ։
Մասնավորապես, առաջարկվում է տպագիր մամուլում պարտադիր հրապարակման պահանջը փոխարինել «azdarar.am» հրապարակային ծանուցումների պաշտոնական կայքում կամ համապատասխան կազմակերպության վեբ-կայքում տեղեկատվության տեղադրմամբ։
«Տպագիր մամուլում հրապարակման գործընթացը բավականին ծախսատար է, այս ամենը հանգեցնում է հանրության լայն շրջանակների համար տեղեկատվության փաստացի սահմանափակման եւ լրացուցիչ ծախսերի, հետեւաբար տպագիր մամուլի հրապարակումները ներկայում չեն կարող համարվել արդյունավետ կամ հասանելի ձեւ՝ տեղեկատվության տարածման համար», - մեկնաբանել է Գալյանը։
Նախարարի խոսքով՝ գործող նորմերի վերանայումը թելադրված է նաև տեղեկատվական տեխնոլոգիաների զարգացմանը զուգահեռ իրավական դաշտի ներդաշնակեցման անհրաժեշտությամբ։
Նա նաև տեղեկացրեց ևս մեկ էլեկտրոնային հարթակի՝ «hartak.am»-ի շուտափույթ գործարկման մասին, որտեղ ներկայացված կլինեն բոլոր ծանուցումները, այդ թվում՝ դատաիրավական համակարգի և քաղաքացիների վերաբերյալ։ Այս համակարգ մուտքն իրականացվելու է բացառապես նույնականացման մեթոդով։
«Կան բոլոր նախադրյալները, որպեսզի այս հարթակը գործարկվի արդեն հաջորդ ամսվանից։ Սակայն այն լիովին գործարկված չի լինի ևս երեք ամիս, այսինքն՝ բոլոր անհրաժեշտ ենթաօրենսդրական ակտերի ընդունումից հետո», - հավելել է Կառավարության ներկայացուցիչը։
Որոշակի քննարկումներից հետո այս օրենսդրական նախաձեռնությունը դրական կարծիք արձագանք է ստացել մշտական խորհրդարանական հանձնաժողովից։
Ես սխալ չունեմ, էկոնոմիկան էլ շատ լավ վիճակում ա, սենց տնտեսական աճ մատների վրա հաշված երկրներում կա. Պապոյան 
