Իսրայելի վարչապետ Բենիամին Նեթանյահուն հայտարարել է, որ իր երկիրը Լիբանանի հետ խաղաղության համաձայնագրի հասնելու «պատմական» հնարավորություն ունի, հաղորդում է Times of Israel-ը։
«Մենք հնարավորություն ունենք Լիբանանի հետ պատմական խաղաղության համաձայնագրի հասնելու»,- տեսաուղերձում ասել է Նեթանյահուն՝ նշելով, որ ԱՄՆ նախագահ Դոնալդ Թրամփը մտադիր է իրեն և Լիբանանի նախագահ Ջոզեֆ Աունին հրավիրել Սպիտակ տուն՝ բանակցություններն առաջ մղելու համար։
Նեթանյահուն նշել է, որ Իսրայելը «փոխել է ուժերի հավասարակշռությունը Լիբանանում», հղում անելով անցյալի գործողություններին, ինչպիսիք են 2024 թվականի փեյջերներով հարձակումը, խմբավորման հրթիռային զինանոցի ոչնչացումը և դրա առաջնորդ Հասան Նասրալլահի սպանությունը։
Նա հավելել է, որ անցյալ ամիս Իսրայելը Լիբանանից ստացել է ուղիղ բանակցությունների կոչեր՝ «ավելի քան 40 տարվա ընթացքում առաջին անգամ»։
«Ես արձագանքել եմ այդ կոչին»,- ասել է Նեթանյահուն։
Նա նշել է, որ Իսրայելը համաձայնել է «ժամանակավոր 10-օրյա հրադադարի»՝ բանակցությունները առաջ մղելու փորձ կատարելու համար, սակայն ընդգծել է, որ հիմնական պահանջներն անփոփոխ են. «Հըզբոլլահի զինաթափում և կայուն խաղաղություն՝ ուժի վրա հիմնված խաղաղություն»։
Նեթանյահուն շեշտել է, որ մերժում է Հըզբոլլահի՝ հրադադարի պայմանները՝ «իսրայելական զորքերի դուրսբերումը Լիբանանի բոլոր տարածքներից մինչև միջազգային սահմանը և «լռություն լռության դիմաց» ձևաչափով հրադադարը», սակայն խումբը, այնուամենայնիվ, համաձայնել է հրադադարին։
Նա ընդգծել է, որ իսրայելական զորքերը կմնան Լիբանանում։
