Էկոնոմիկայի նախարարությունը հարցուպատասխանի ձևաչափով պարզաբանում է տարածել Հայաստանում հեղուկ գազի մատակարարման հետ կապված իրավիճակի վերաբերյալ։
Նախարարության հաղորդագրության մեջ, մասնավորապես, ասվում է. «Հաշվի առնելով թեմայի նկատմամբ հանրային մեծ հետաքրքրությունը՝ ներկայացնում ենք առավել հաճախ հնչող հարցերի պատասխանները՝ իրավիճակի վերաբերյալ հստակ և պաշտոնական տեղեկատվություն ապահովելու նպատակով։
Հայաստանում հեղուկ գազի դեֆիցի՞տ կա։
Լարսի անցակետում առաջացած կուտակումների և լոգիստիկ ժամանակավոր դժվարությունների պատճառով հեղուկ գազ տեղափոխող որոշ բեռնատարների մուտքը Հայաստան ուշացել է, ինչն ազդել է շուկայում մատակարարումների բնականոն ռիթմի վրա։ Խոսքն ամբողջական դեֆիցիտի մասին չէ, սակայն առանձին լցակայաններում հնարավոր են մատակարարման ժամանակավոր ընդհատումներ։
Ի՞նչ է անում Կառավարությունը։
Պատասխանատու պետական մարմինները մշտական կապի մեջ են ներմուծող ընկերությունների և գործընկեր կառույցների հետ՝ իրավիճակը հնարավորինս արագ կարգավորելու և շուկայի բնականոն մատակարարումը վերականգնելու նպատակով։
Գների բարձրացման ռիսկ կա՞։
Գների վրա կարող են ազդեցություն ունենալ ոչ միայն լոգիստիկ դժվարությունները, այլև տարածաշրջանային զարգացումներով պայմանավորված միջազգային շուկայի տատանումները։ Միաժամանակ, շուկան գտնվում է մշտադիտարկման ներքո, և պատկան մարմինները հետևում են իրավիճակին՝ բացառելու անհիմն գնաճն ու հնարավոր սպեկուլյատիվ դրսևորումները։
Քաղաքացիներն ի՞նչ պետք է անեն։
Հորդորում ենք քաղաքացիներին չտրվել խուճապային գնումների և հետևել բացառապես պաշտոնական տեղեկատվությանը։ Իրավիճակի կարգավորմանն ուղղված աշխատանքներն ընթացքի մեջ են։
Ավելի վաղ NEWS.am–ը հայտնել էր, որ հանրապետությունում հեղուկ գազը կտրուկ թանկացել է՝ հասնելով 260-300 դրամի։ բացի այդ, հեղուկ գազի դեֆիցիտ է նկատվում, և լցակայաններում երկար հերթեր են գոյացել։
Կրակոցներ Պաշտոնից դուրս․տեսանյութ 
