Նոր կլիմայական ուսումնասիրությունների ֆոնին հրապարակված հետազոտությունը ուշադրություն է հրավիրում անսպասելի ազդեցության վրա․ օդի աղտոտվածության նվազեցման միջոցները կարող են անուղղակիորեն ազդել Ատլանտիկայում օվկիանոսային շրջանառության վրա՝ այն համակարգի, որի մի մասն է նաև Գոլֆստրիմը, գրում է Daily Mail-ը։


Խոսքը հոսանքի ուղղակի փոփոխության մասին չէ, այլ կլիմայական գործընթացների ավելի բարդ շղթայի։


Գիտնականները մեխանիզմը բացատրում են հետևյալ կերպ․ երբ մթնոլորտում աերոզոլների՝ աղտոտման այն մասնիկների, որոնք մասամբ արտացոլում են արևի լույսը, քանակը նվազում է, Երկիրը ստանում է ավելի շատ արևային ճառագայթում։ Սա ուժեղացնում է օվկիանոսի մակերևույթի տաքացումը, հատկապես Հյուսիսային Ատլանտիկայում։

Այս լրացուցիչ տաքացումը կարող է ազդել Atlantic Meridional Overturning Circulation (AMOC)-ի՝ օվկիանոսային հոսանքների խոշոր համակարգի վրա, որի մեջ մտնում է նաև Գոլֆստրիմը։

Հետազոտողների գնահատմամբ՝ աերոզոլային աղտոտման արագացված կրճատումը կարող է դարի կեսերին լրացուցիչ թուլացնել այս շրջանառությունը մոտավորապես մի քանի տոկոսով՝ ջերմոցային գազերի արդեն սպասվող ազդեցությունից բացի։

Կարևոր է, որ խոսքը մոտ ժամանակում Գոլֆստրիմի «խափանման» մասին չէ, այլ համակարգի հավասարակշռության աստիճանական փոփոխության։ AMOC-ը առանցքային դեր ունի արևադարձային գոտիների և Ատլանտիկայի հյուսիսային հատվածի միջև ջերմության վերաբաշխման գործում, ուստի նույնիսկ փոքր փոփոխությունները կարող են ազդել Եվրոպայի կլիմայի վրա՝ ներառյալ ձմեռների բնույթն ու փոթորիկների հաճախականությունը։

Աշխատանքի եզրակացությունը բավական պարադոքսալ է․ մարդկանց առողջությանն ու օդի որակի բարելավմանը միտված միջոցները կարող են միաժամանակ արագացնել փոփոխությունները գլոբալ կլիմայական համակարգում։ Սա չի վերացնում աղտոտման կրճատման անհրաժեշտությունը, բայց ընդգծում է, թե որքան փոխկապակցված են մթնոլորտային և օվկիանոսային գործընթացները։