Վիեննայում ՄԱԿ-ի կառույցներում և այլ միջազգային կազմակերպություններում Իրանի մշտական ներկայացուցչությունն Ատոմային էներգիայի միջազգային գործակալության (ԱԷՄԳ Կառավարիչների խորհրդի հատուկ նիստում հանդես է եկել խիստ հայտարարությամբ), հայտնում է Press TV-ն։


Իրանցի դիվանագետները միջազգային հանրությանը կոչ են արել «զրոյական հանդուրժողականության» քաղաքականություն մշակել խաղաղ միջուկային օբյեկտների վրա զինված հարձակումների նկատմամբ և միջազգային մակարդակով ամրագրել դրանց բացարձակ անձեռնմխելիության սկզբունքը։


Իրանական առաքելության հայտարարության համաձայն՝ ատոմային էներգետիկայի քաղաքացիական օբյեկտներին հասցվող ռազմական հարվածները հիմնարար կերպով խախտում են Միջուկային զենքի չտարածման մասին պայմանագիրը և ԱԷՄԳ-ի Կանոնադրությունը՝ խաթարելով գլոբալ անվտանգության կայունությունը։ Դիվանագետները հիշեցրել են, որ հենց Իրանն է նախկինում նախաձեռնել ԱԷՄԳ-ի Գլխավոր կոնֆերանսի բանաձևերը (№444 և №533), որոնք արգելում են նման հարձակումները, մինչդեռ ԱՄՆ-ն դեմ է արտահայտվել դրանց։

Թեհրանը Վաշինգտոնի և Թել Ավիվի վերջին գործողությունները որակել է որպես «միջուկային ահաբեկչության ակտեր»։ Ըստ փաստաթղթի՝ էսկալացիայի ալիքների ընթացքում (2025 թվականի հունիսին և 2026 թվականի հունվարից ապրիլ ընկած ժամանակահատվածում) միջուկային զենք ունեցող ԱՄՆ-ն ու Իսրայելն ընդհանուր առմամբ 17 զանգվածային հարձակումների ալիք են իրականացրել ԱԷՄԳ-ի երաշխիքների ներքո գտնվող իրանական միջուկային օբյեկտների վրա։ Իրանական կողմն այդ հարվածներն անվանել է աննախադեպ իրենց մասշտաբներով՝ գործակալության ամբողջ պատմության ընթացքում։

Հատուկ ուշադրություն է դարձվել Բուշերի ատոմակայանի գնդակոծությանը. հրթիռներից մեկը պայթել է ռեակտորից ընդամենը 350 մետր հեռավորության վրա, ինչը հանգեցրել է մարդկային զոհերի։ Իրանն ընդգծել է, որ ուղիղ հարվածը կայանին, որտեղ պահվում են հազարավոր կիլոգրամներով միջուկային նյութեր, կարող էր ռադիացիայի հսկայական արտանետում առաջացնել շրջակա միջավայր։ Այս պահին ԱԷԿ-ը շարունակում է էլեկտրաէներգիայի անվտանգ արտադրությունը։

Բացի դրանից, Իրանը քննադատել է ԱԷՄԳ-ի գլխավոր տնօրեն Ռաֆայել Գրոսիին՝ ամերիկա-իսրայելական հարվածներն ուղղակիորեն չդատապարտելու համար։ Թեհրանում ակնարկել են, որ գործակալության ղեկավարը, հաշվի առնելով իր հավակնությունները և ՄԱԿ-ի գլխավոր քարտուղարի պաշտոնի թեկնածուի կարգավիճակը, պետք է խստորեն հավատարիմ մնա անկողմնակալության, պրոֆեսիոնալիզմի և ՄԱԿ-ի պաշտոնական տերմինաբանության սկզբունքներին՝ իր կառույցի հանդեպ վստահությունը պահպանելու համար։

Ի վերջո, իրանական առաքելությունը հիշեցրել է 1981 թվականի պատմական նախադեպը, երբ Իրաքի միջուկային կենտրոնին հասցված իսրայելական հարվածից հետո ԱԷՄԳ-ի Կառավարիչների խորհուրդը վճռականորեն դատապարտեց Թել Ավիվին և կասեցրեց նրան օգնության տրամադրումը, սակայն Իսրայելի անդամակցությունն ամբողջությամբ սառեցնել այն ժամանակ չհաջողվեց ԱՄՆ-ի կողմից ճնշումների և ֆինանսական սպառնալիքների պատճառով։