Ղազար Մկրտչյանն, ըստ մեղադրանքի, Երևանի ավագանու ընտրություններին մեկից ավելի անգամ քվեարկություն կատարելու դիտավորությամբ, կնոջ՝ Անահիտ Համբարձումյանի հետ 2013թ. մայիսի 5-ին` ժամը 08:20-ի սահմաններում, գնացել է Երևանի Ներքին Շենգավիթ 12-րդ փողոցում գտնվող թիվ 97 դպրոցում տեղակայված թիվ 11/32 ընտրական տեղամաս, ստացել երկու քվեաթերթիկ և ծրար, մեկից ավելի անգամ փորձել է քվեարկություն կատարել: Սակայն «իր կամքից անկախ հանգամանքներով` չի կարողացել հանցագործությունն ավարտին հասցնել՝ տեղում բռնվել է ընտրական հանձնաժողովի նախագահի կողմից»: Ամբաստանյալ Ղազար Մկրտչյանն առաջադրված մեղադրանքում իրեն մեղավոր չի ճանաչել և ցուցմունք է տվել այն մասին, որ իր իմանալով՝ քվեաթերթիկները երկուսն են, քանի որ պետք է ընտրի մեկ կուսակցություն և մեկ թեկնածուի: Քվեաթերթիկները չի կարդացել, քանի որ տեսողությունը վատ է եղել և տան անդամներից, ինչպես նաև գովազդներից իմացել է, որ պետք է ընտրի նախավերջին հատվածում նշված կուսակցությանը և թեկնածուին: Իրենից առաջ կուտակում չի եղել, ինքը ընտրողներից թվով երրորդն է եղել: Հանձնաժողովի նախագահի հարցին պատասխանել է, որ քվեաթերթիկները երկու հատ են և մատնացույց է արել այն անձին, ով իրեն տվել է երկրորդ քվեաթերթիկը: Երևանի Շենգավիթ վարչական շրջանի ընդհանուր իրավասության առաջին ատյանի դատարանը` դատավոր Ն.Բաղդասարյանի նախագահությամբ, հոկտեմբերի 21-ի դատավճռով գտել է, որ ամբաստանյալ Ղազար Մկրտչյանի ցուցմունքները` մեկից ավելի անգամ քվեարկելու փորձ չկատարելու մասով, իրականությանը չեն համապատասխանում, քրեական պատասխանատվությունից և պատժից խուսափելու նպատակ են հետապնդում և հերքվում են գործի այլ ապացույցներով: Դատարանն ամբաստանյալ Ղազար Մկրտչյանին մեղավոր է ճանաչել ՀՀ քրեական օրենսգրքի 34-153-րդ հոդվածով՝ Մեկից ավելի անգամ կամ այլ անձի փոխարեն քվեարկելու փորձ, և դատապարտել պայմանական ազատազրկման 2 տարի ժամկետով՝ 1 տարվա փորձաշրջանով: Պատիժ նշանակելիս դատարանը հաշվի է առել, որ ամբաստանյալը կենսաթոշակառու է, նախկինում դատված չի եղել, ՀՀ ոստիկանության զորքերում իր ֆունկցիոնալ պարտականությունները բարեխիղճ և օրինակելի կատարելու համար պարգևատրվել է պատվոգրերով և «Ոստիկանության զորքերում գերազանց ծառայության համար» 2-րդ աստիճանի կրծքանշանով: