Վարչապետ Տիգրան Սարգսյանն աշխատանքային այց է կատարել Դիլիջան: Կառավարության ղեկավարը եղել է Դիլիջանի միջազգային դպրոցում, որտեղ նրան ներկայացրել են կրթական այդ հաստատության շինարարական աշխատանքների ընթացքը:

Դիլիջանի միջազգային դպրոցն իր դռները կբացի 2014 թվականի սեպտեմբերին։ Առաջին ուսումնական տարում այն կընդունի 90 աշակերտ, որոնց թիվը 2023թ.-ին կհասնի 650-ի՝ 60 երկրներից: Աշակերտների 90 տոկոսը դպրոցում սովորելու է անվճար` բարերարների կողմից հատկացված կրթաթոշակների շնորհիվ:

Հայաստանցի շնորհալի ու տաղանդավոր երեխաները կազմելու են դպրոցի աշակերտների 10 տոկոսը, իսկ սփյուռքահայ երեխաների թիվը՝ մոտ 30 տոկոս։

Լրագրողների հետ զրույցում վարչապետը բարձր է գնահատել դպրոցի նշանակությունն ինչպես Դիլիջանի, այնպես էլ Հայաստանի զարգացման հարցում:

«Իրականացվում է ժամանակակից շինարարություն՝ նոր տեխնոլոգիաների կիրառմամբ, որոնք Հայաստանում դեռևս չեն օգտագործվել: Սա մեզ համար կարևոր է, քանի որ այդ փորձը, գիտելիքը կկարողանանք կիրառել նաև այլ շինարարական օբյեկտներում: 64 հազար քմ ընդհանուր տարածքում գործելու է մեծ համալիր՝ ժամանակակից սպասարկման նոր մեթոդների կիրառմամբ: Այս պահին այս օբյեկտի շնորհիվ ստեղծվել է շուրջ 1000 աշխատատեղ, սակայն կարևորն այն է, որ երբ այն հանձնվի շահագործման, կստեղծվեն նաև լրացուցիչ նոր բարձր որակավորում պահանջող աշխատատեղեր՝ բարձր աշխատավարձով: Այս օբյեկտը Հայաստանի համար լուրջ առաջընթաց է», - ասել է վարչապետը:

Տիգրան Սարգսյանի կարծիքով՝ մեր քաղաքացիները կգնահատեն այս օբյեկտի կարևոր նշանակությունը ոչ միայն Դիլիջանի, այլ ընդհանրապես, մեր երկրի կյանքում, քանի որ դպրոցը համաշխարհային կրթական քարտեզի վրա ունենալու է իր տեղն ու նշանակությունը և համապատասխանելու է միջազգային չափանիշներին: Կառավարության ղեկավարի համոզմամբ՝ դրա արդյունքում կբարձրանա նաև մեր երկրի համբավը:

Վարչապետը տեղեկացրել է նաև, որ ՀՀ կառավարության մոտակա նիստերից մեկի ընթացքում կքննարկվի Դիլիջանի միջազգային դպրոցին հարակից ենթակառուցվածքների զարգացման ծրագիրը, ինչի իրականացման համար պետությունը կհատկացնի անհրաժեշտ ֆինանսական միջոցներ:

Դպրոցական համալիրը, բացի ուսումնական մասնաշենքերից ու կացարաններից, ներառում է նաև փակ լողավազան, մարզահրապարակներ, բազմաֆունկցիոնալ, բեմարվեստի, դիզայնի, տեխնոլոգիաների և բժշկական կենտրոններ: Դպրոցի կապիտալ շինարարության և կահավորման բյուջեն կազմում է մոտ 190 մլն դոլար: Ընդ որում, շինարարության առաջին փուլի՝ IB ծրագրի համար անհրաժեշտ կառույցների արժեքը կկազմի 110 մլն դոլար, որից մոտ 50 մլն դոլարն արդեն ներդրված է: Երկրորդ փուլի համար, որը ներառում է նաև տարածաշրջանում լավագույն բեմարվեստի կենտրոնի կառուցումը, նախատեսված արժեքը կազմում է 80 մլն դոլար: Դպրոցի տարեկան գործառնական ծախսերը (2014 թ. սկսած) կկազմեն 3 մլն դոլար, իսկ 650 աշակերտ և 111 աշխատակից ունենալու դեպքում՝ 15 մլն դոլար:

ՀՀ կառավարության հեղինակած օրինագիծը՝ «Դիլիջանի միջազգային դպրոց» ծրագրի շրջանակներում հարկային և մաքսային արտոնություններ տրամադրելու մասին», անցած տարեվերջին ընդունվել է Ազգային Ժողովի կողմից:

2013 թ. հոկտեմբերի վերջին Դիլիջանի միջազգային դպրոցը դարձել է Միացյալ համաշխարհային քոլեջներ (United World Colleges-UWC) կրթական ցանցի անդամ և ստացել «UWC Dilijan» անվանումը: Այս տարի UWC համակարգում կարող են ուսանել ՀՀ 17 քաղաքացիներ` 10-ը UWC Dilijan միջազգային դպրոցում, 7-ը` UWC-ի այլ երկրների քոլեջներում:

Դպրոցի հոգաբարձուների խորհրդի նախագահն է ՀՀ վարչապետ Տիգրան Սարգսյանը: