2012 թվականից Հայաստանը հանդիսանում է Եվրոպական տեսաձայնային դիտարանի (օբսերվատորիայի) անդամ, որը վավերացվել է Ստրասբուրգում՝ Եվրոպական տեսաձայնային դիտարանի 20-ամյակին նվիրված գիտաժողովի գործադիր խորհրդի նիստում (2012 թ. նոյեմբերի 6-10-ը): Անդամակցությունը ենթադրում է հստակ աշխատանքների իրականացում միջազգային կինոարդյունաբերության ոլորտում, կինոարտադրության և պատրաստի ֆիլմերի շահագործման գործընթացում:
Եվրոպական տեսաձայնային դիտարանը կազմակերպություն է, որը հետազոտական կարևորագույն աշխատանք է կատարում միջազգային ասպարեզում կինոյի և տեսալսողական արդյունաբերության այլ ճյուղերում` օգնելով այդ բնագավառի մասնագետներին: Հայաստանի անդամակցության նպատակն է՝ ինտեգրվել համաշխարհային կինոարդյունաբերության գործընթացին, ինչպես նաև ստանալ համապատասխան աջակցություն:
Եվրոպական տեսաձայնային դիտարանի փորձագետների հետազոտությունները հատկապես արժեքավոր են և կարևոր դեր են կատարում միջազգային ասպարեզում: Հայաստանի անդամակցությունը հնարավորություն կտա զանգվածային տեղեկատվության եվրոպական մասնագետներին՝ ստանալու անհրաժեշտ տվյալներ և անցկացնելու իրավական դաշտի վերլուծություն Հայաստանի տեսալսողական հատվածում:
2013 թ. Հայաստանը, որպես Եվրոպական տեսաձայնային դիտարանի անդամ երկիր, ի դեմս «Հայաստանի ազգային կինոկենտրոն» ՊՈԱԿ-ի, շարունակել է համագործակցությունը՝ մասնակցելով դիտարանի աշխատանքներին և տեսաձայնային արվեստի մասնագիտացված խնդիրների վերաբերյալ կոնֆերանսին:
2014 թ. ապրիլին հրատարակվել է Եվրոպական տեսաձայնային դիտարանի 2013 թ. տարեգիրքը, որում, ի թիվս այլոց, առաջին անգամ ներառվել է տեղեկատվություն Հայաստանի վերաբերյալ: