Հուլիսի 14-ին ՀՀ ԱԺ արտաքին հարաբերությունների մշտական հանձնաժողովի նախագահ Արտակ Զաքարյանը, հանձնաժողովի անդամներ Թեւան Պողոսյանը եւ Շիրակ Թորոսյանը հանդիպեցին Բուլղարիա-Հայաստան բարեկամական խմբի ղեկավար Աթանաս Զաֆիրովի եւ խմբի անդամ Դիմիտար Լազարովի հետ:

Խոսելով երկու ժողովուրդների բարեկամության մասին` Արտակ Զաքարյանը նշեց, որ կարեւորում է նրանց այցելությունը ՀՀ: Նշվեց, որ հայ եւ բուլղար ժողովուրդներն ունեն պատմական ընդհանրություններ:

Զրուցակիցները կարեւորեցին միջխորհրդարանական հարաբերությունների զարգացումը, տարբեր միջազգային խորհրդարանական հարթակներում փոխգործակցության խորացումը:

Անդրադարձ կատարելով առեւտրատնտեսական կապերի զարգացմանը՝ նշվեց, որ առկա ներուժը ներկայումս բավարար մակարդակով չի իրացվում, ուստի կողմերը պատրաստակամություն հայտնեցին իրենց իրավասությունների շրջանակում ջանքեր գործադրել մի շարք ոլորտներում փոխշահավետ համագործակցության զարգացմանը նպաստելու համար:

Արտակ Զաքարյանը մանրամասն ներկայացրեց տարածաշրջանային զարգացումները եւ ՀՀ արտաքին քաղաքական խնդիրները: Խոսվեց ԼՂ խնդրի կարգավորման ներկա իրավիճակի մասին:

Հանդիպման ընթացքում հայ-բուլղարական միջխորհրդարանական հարաբերությունների եւ դրանց զարգացման հեռանկարների մասին խոսեցին նաեւ ԱԺ արտաքին հարաբերությունների մշտական հանձնաժողովի անդամներ Թեւան Պողոսյանը եւ Շիրակ Թորոսյանը:

Անդրադարձ կատարվեց նաեւ Հայոց ցեղասպանության 100-ամյա տարելիցի միջոցառումներին եւ երկկողմ հետաքրքրություն ներկայացնող այլ հարցերի:

 

Հայաստան-Բուլղարիա բարեկամական խմբի ղեկավար Մանվել Բադեյանը հուլիսի 14-ին հանդիպեց Բուլղարիա-Հայաստան բարեկամական խմբի ղեկավար Աթանաս Զաֆիրովին եւ խմբի անդամ Դիմիտար Լազարովին:

Ողջունելով բուլղար գործընկերներին՝ Հայաստան-Բուլղարիա բարեկամական խմբի ղեկավար Մանվել Բադեյանը կարեւորեց երկու խորհրդարաննների միջեւ համագործակցության հետագա խորացումը եւ բարեկամական խմբերի փոխայցերը:

Ջերմ եւ անկաշկանդ զրույցի ընթացքում բարեկամական խմբերի անդամներն անդրադարձան տարբեր ոլորտներում ձեւավորված հայ-բուլղարական հարաբերություններին՝ նպատակահարմար համարեցին մասնավորապես առեւտրատնտեսական հարաբերությունների զարգացումն ու խորացումը, երկու երկրների միջեւ ապրանքաշրջանառության ծավալների մեծացումը:

Զրուցակիցներն անդրադարձան նաեւ զբոսաշրջության ոլորտում համագործակցությանը:

Հանդիպման ընթացքում զրուցակիցներն անդրադարձան փոխադարձ հետաքրքրություն ներկայացնող մի շարք հարցերի: