Էբոլա վիրուսով վարակման դեպքերի ընդհանուր թիվը, համաճարակի ներկայիս բռնկման ողջ ընթացքում, կարող է 20 հազարի սահմանը հատել: Այսպիսի կանխատեսմամբ, հիվանդության դեմ պայքարի «ճանապարհային քարտեզի» շրջանակում, առողջապահության համաշխարհային կազմակերպությունն է հանդես եկել, հաղորդում է CNN-ը:
«Սույն «ճանապարհային քարտեզը» ենթադրում է, որ վիրուսի ինտենսիվ տարածմամբ աչքի ընկնող բազմաթիվ գոտիներում վարակման դեպքերի իրական թիվը կարող է արձանագրվածից 2-4 անգամ բարձր լինել: Ներկայիս արտակարգ իրադրության ողջ ընթացքում Էբոլա վիրուսով հրահրված հիվանդությամբ վարակվածների թիվը կարող է առնվազն 20 հազար կազմել», - ասվում է հրապարակված փաստաթղթում: Բացի այդ, կազմակերպության ներկայացուցիչները նշել են, որ Արևմտյան Աֆրիկայում մոլեգնող վիրուսի դեմ պայքարի կազմակերպման համար 490 մլն ԱՄՆ դոլարի կարիք է զգացվում:
Արձանագրված տվյալների համաձայն, ներկայիս դրությամբ հիշյալ երկրներում Էբոլա վիրուսով վարակման դեպքերի թիվը 3069-ի է հասել, որից 1552-ը՝ մահվան ելքով:
Միևնույն ժամանակ, ալերգիկ և ինֆեկցիոն հիվանդությունների ամերիկյան ազգային ինսիտուտը գալիք շաբաթվա ընթացքում մտադիր է Էբոլայով հրահրված հիվանդությամ դեմ մշակված պատվաստանյութի՝ մարդկանց նկատմամբ փորձարկումներ մեկնարկել:
GlaxoSmithKline դեղագործական ընկերության և վերոնշյալ ինստիտուտի համատեղ ջանքերով մշակված դեղամիջոցի փորձարկումները Վաշինգտոնի արվարձանային բնակավայրերից մեկի՝ Բետեսդի (Մերիլենդ նահանգ) բուժհաստատություններից մեկում են իրականացվելու՝ 20 կամավորների մասնակցությամբ:
Պատվաստանյութի փորձարկման հաջորդ փուլը սեպտեմբեր ամսին՝ Մեծ Բրիտանիայում՝ ԱՄՆ առողջապահության ազգային ինստիտուտը ներկայացնող փորձագետների և բրիտանացի մասնագետների համատեղ ջանքերով է իրականացվելու՝ 100 կամավորների շրջանում:
