Երբ   Դաշնակցությունը որոշում ունենա  Երևանի ավագանու ընտրությունների մասնակցության վերաբերյալ, այն կհրապարակի: Այս մասին YerevaNews.am-ի հետ զրույցում ասաց ՀՅԴ Գերագույն Մարմնի փոխներկայացուցիչ Արսեն Համբարձումյանը՝ պատասխանելով այն հարցին, թե  համապատասխանում է իրականությանն այն տեղեկությունը, ըստ որի  ՀՅԴ­ն սեփական ցուցակով է մասնակցելու Երևանի ավագանու ընտրություններին և այն գլխավորելու է Արմեն Ռուստամյանը:

Արսեն Համբարձումյանն ասաց, որ այս պահին դեռ որոշում չունեն դաշինքով են մասնակցում, թե առանձին ցուցակով և նշեց.«Առիթ ունեցել ենք ասելու, մինչև շաբաթվա վերջ կարծում եմ վերջնականապես պարզ կլինի միասնական ձևաչափով գնալու հնարավորության հարցը և ըստ այդմ   վերջնական որոշում կկայացվի»:

Այն հարցին, թե ինչպիսի՞ն է Դաշնակցության վերաբերմունքը ԲՀԿ-­ի այն հայտարարության վերաբերյալ, որ նրանք պատրաստ են համախմբում տեսնել  ԲՀԿ­ի առանցքի շուրջ՝ Արսեն Համբարձումյանն ասաց.«Միայն մի բան կարող եմ ասել, որ Դաշնակցությունը երբևէ որևէ անձի կամ կուսակցության առանցքի շուրջ չի միավորվել և հետայսու էլ նման խնդիր չկա: Եթե խոսքը վերաբերվում է որոշակի  նպատակի, որոշակի գաղափարների դա այլ խնդիր է, բայց  կուսակցության առանցքի շուրջ համախմբվել Դաշնակցությունը չի պատրաստվում»:

 Նշենք, որ «Հայկական ժամանակ»­ն իր այսօրվա համարում գրել էր, որ ՀՅԴ ավագանու  համամասնական ցուցակը գլխավորելու է  Արմեն Ռուստամյանը։