«Արդեն 14 տարի է ՅՈՒՆԵՍԿՈ-ի որոշմամբ աշխարհը նշում է Պոեզիայի օր: Այսպիսով ՅՈՒՆԵՍԿՈ-ն շնորհավորում `պոեզիայի քարոզչություն, սատարում ստեղծագործական, կրոնական միջազգային գրական շարժումներին և օգնում է անհետացող լեզուներին»,- այսպես սկսեց լրագրողների հետ հանդիպումը Հայաստանի գրողների միության նախագահ Լևոն Անանյանը:
Հայաստանն արդեն երրորդ տարին է, ինչ նշում է Պոեզիայի համաշխարհային օրը: Առաջին տարին այն անցկացվել է Տերյանի պուրակում, երկրորդ տարին նվիրված է եղել ռուս գրող Պաստերնակին, իսկ այս տարի առանցքում պահվում է Հրաչյա Թամրազյանի նոր «Սրբազան խավար» գիրքը: Պոեզիայի միջազգային օրվան նվիրված միջոցառումներն արդեն մեկնարկել են:
«Երեկ Չարենցին նվիրված տասնօրյակի շրջանակներում Սլավոնական համալսարանում տեղի ունեցավ հանդիպում ուսանողների հետ: Մասնակցեցին հինգ բանաստեղծ` Սփյուռքի և Հայաստանից: Այսօր և վաղը շարունակվում են հանդիպումները Ավետիք Իսահակյանի անվան գրադարանում»,- նշեց Լևոն Անանյանը:
Միջոցառումներն այսքանով չեն սահմանափակվում: Սպասվում է նաև գիքր շնորհանդես, հայերեն լեզվի և գրականության ուսուցիչների հետ ամենամյան հանդիպում, «Բանաստեղծը և ժամանակը» թեմայով:
Գրողների միության նախագահի խոսքերով այժմ իրականացվում է թարգմանական ծրագիր արդի հայ բանաստեղծությունը աշխարհի տարբեր լեզուներով ներկայացնելու նպատակով: Արդեն վեց լեզուներով ընթերցողին է ներկայացվել հայ պոեզիան`ֆրանսերեն, գերմաներեն, զվեդերեն, վրացերեն և պարսկերեն, վերջինս առանձին մեծ ծրագիր է:
Ուշագրավ է , որ այս տարի Երևանում առաջին անգամ պետք է նշվի Պոեզիայի միջազգային փառատոն:
«Արդեն տարիներ շարունակ մենք համոզում էինք պատկան մարմիններին, որ մեր երկրում անցկացվի պոեզիայի փառատոն: Մենք պոեզիայի երկիր լինելով պարտավոր ենք մեր բանաստեղծությունը ներկայացնել աշխարհին: Երևանը գրքի համաշխարհային մայրաքաղաք տոնի ավարտին լավագույն ակորդ համարվեց այս ծրագիրը»:
Ապրիլի 15-21 տեղի ունենալիք միջոցառման հրավերին արդեն արձագանքել են երեսուն երկրներից, ժամանելու են հիսունից ավելի անվանի գրողներ: Կլինեն հյուրեր Ֆրանսիայից, Գերմանիայից, Ավստրալիայից, Թուրքիայից, Իրանից , ինչպես նաև բանակցություններ են տարվում Թայլանդից բանաստեղծ հրավիրելու համար, ում պետք է հանձնել գրքի համաշխարհային մայրաքաղաքի «բանալիները»: Փառատոնի բացման արարողությունը տեղի կունենա «Կասկադ» համալիրում:
Անդրադառնալով պոեզիայի պուրակին` Լևոն Անանյանը նշեց, որ լավագույն տարբերակը Մաշտոցի այգին է, սակայն բնապահպան ակտիվիստների հետ որոշ անհամաձայնություններ կան: Համաձայնության չգալու դեպքում որպես Պոեզիայի պուրակ կընտրվի քաղաքի կենտրոնի այգիներից մեկը: