Վաղը կավարտվի և հանդիսատեսը կբացահայտի «Պարիր, թե կարող ես» նախագծի լավագույն պարողներին: Կիմանանք, թե ով և ինչի համար կստանա հաղթողի տիտղոսը և ում համար է հուզվում կամ ուրախանում հանդիսատեսը: Համառոտ անրադարձ կատարենք և ներկայացնենք եզրափակիչ դուրս եկած մասնակիցներին:  

Լոլա Քարամյան, պարուհի ով հանդիսացավ այս նախագծի բացահայտումը և բազմաթիվ անգամներ իր գեղեցիկ պարով զարմացրեց հանդիսատեսին: Այս նախագծում Լոլան առանձնացավ  գրագետ պարով,  նա կարծես թե ոգեշնչում և իր ետևից տանում էր մնացած մասնակիցներին, իսկ կարևոր և ազդեցիկ էին պարերի ընթացքում նրա դերասանական խաղը, որը ավելի շատ հոգեվիճակ էր ու այն զգում էին դահլիճում գտնվող և էկրանի հակառակ կողմում հայտնված մարդիկ:

Լոլան ամփոփելով իր անցած ուղին` «Պարիր, թե կարող ես» նախագծի շրջանակում, խոստովանում է, որ շատ դժվարությունների միջով է անցել և իր ձեռքբերումները պայմանավորում է միայն աշխատասիրության հետ:
«Ի սկզբանե իմ նպատակն է եղել հասնել եզրափակիչ, ջանացել եմ ու ամեն ինչ արել, բայց եզրափակչում հայտնվելը իմ գագաթնակետը չէ, ինձ համար դա միայն սկիզբ եմ  համարում: Կարևորը ոչ միայն մասնակցությունն է, այլ նաև հաղթելը: Չեմ սիրում, որ ասում են մասնակցությունն արդեն հաղթանակ է, ոչ: Եթե մասնակցում եմ, ապա ձգտում եմ և պետք է հաղթեմ, հակառակ դեպքում չէի մասնակցի»,- ասում է Լոլան:


Մասնակիցներից Հովոն համեստ և համարձակ երիտասարդ է: Նա հիշում է, որ ինքը և Լոլան այն եզակի պարողներից էին, ովքեր սկզբից մինչև վերջ միասին են եղել` օգնելով մեկը մյուսին, Հովոն մրցակցությունը առողջ է գնահատում և կարևորում արդար պայքարը: «Ես ուզում եմ շնորհակալություն հայտնել պարուսույցներին և Լոլային, քանի որ նրանք ինձ շատ օգնեցին», -ասաց Հովոն:

Արմինան թե մասնակիցների, և թե հանդիսատեսի մոտ հիմնականում տպավորվել է իր խոսքով, քանի որ հայերենին լավ չի տիրապետում: Արմինայի խոսքով, ծրագրի ընթացքում նա սովորել է լուրջ լինել, քանի որ շատ է ծիծաղում:

«Այս նախագծում բոլորս էլ լավ պարողներ ենք և դժվար էր տեսնել, թե ինչպես է յուրաքանչյուր կիրակի մասնակիցներից մեկը լքում նախագիծը, քանի որ մեզանից յուրաքանչյուրը շատ բարդ փուլեր է հաղթահարել և ինձ համար դա արդեն իսկ հաղթանակ է » ,-պատմում է նա:

Արմանն այն մասնակիցներից է, ով առանձնանում է իր համեստությամբ և մուլտֆիլմների նկատմամբ ունեցած սիրով: Ծրագրի նախկին մասնակիցների կարծիքով,  Արմանը քիչ է խոսում, բայց գործում է, համբերատար է, սակայն կարող է նաև բռնկվել.

«Կիսաեզրափակչում պատասխանատվությունը էլ ավելի է մեծանում, երբ հասկանում ես, որ քո հաղթանակը ոչ թե քո ցանկությունն է  իրականանում, այլ հանդիսատեսի: Չէի սպասում, որ մասնակցելով նախագծին, այնպիսի պատասխանատվություն կկրեմ, որ շատ դեպքերում մտածելու տեղիք է տալիս»,-ինքն իրեն բացահայտում է Արմանը:

Ինչևէ, սպասենք հետագա զարգացումներին: Նախագիծը կավարտվի, բացահայտելով ուժեղագույնին: