Ինչպես արդեն տեղեկացրել էինք հունվարի 29-ի առավոտյան Ռազմական ինստիտուտի մարզահրապարակում հայտնաբերվել էր կուրսանտ Հայկազ Բարսեղյանը՝ պտտաձողի վրա պարանով կախված վիճակում: Ավելի ուշ` նախաքննությամբ պարզվել էր, որ կուրսանտը սպանվել է ծառայակից ընկերների կողմից:
Ձեռք բերված ապացույցների համակցությամբ՝ նույն զորամասի զինծառայողներ Վաչե Սահակյանին, Մովսես Ազարյանին, Գնել Թևոսյանին և Նորիկ Սահակյանին փետրվարի 2-ին մեղադրանք է առաջադրվել՝ ՀՀ քրեական օրենսգրքի 104-րդ հոդվածի 2-րդ մասի 7-րդ և 10-րդ կետերով՝ մի խումբ անձանց կողմից խուլիգանական դրդումներով սպանության համար: Նրանց նկատմամբ որպես խափանման միջոց է ընտրվել կալանավորումը։
Հիշեցնենք, որ նախագահ Սերժ Սարգսյանի հրամանագրով գեներալ-մայոր Արմեն Ղահրամանյանը նշանակվել է Հայաստանի Հանրապետության պաշտպանության նախարարության Վազգեն Սարգսյանի անվան ռազմական ինստիտուտի պետ: Նա զբաղեցնում էր Պաշտպանական բանակի հրամանատարի 1-ին տեղակալի պաշտոնը:
Պաշտպանության նախարարը հանձնարարել էր ծառայողական քննության արդյունքների հիման վրա կազմել հեռանկարային պլան` հայտնաբերված թերությունները վերացնելու և ուսումնական գործընթացը հիմնովին բարելավելու ուղղությամբ, ինչպես նաև արտական կադրային փոփոխություններ կատարել։
Քիչ առաջ YerevanNews.am-ին հայտնի դարձավ, որ գնդապետ Արմեն Հարությունյանը ՀՀ պաշտպանության նախարար Սեյրան Օհանյանի հրամանով նշանակվել է Վ․Սարգսյանի անվ․ Ռազմական Ինստիտուտի պետի առաջին տեղակալ։ Նշանակվել են նաև այլ պաշտոնատար անձինք։
Գնդապետ Ա․ Հարությունյանը ՀՀ Զինված Ուժերում է 1992 թվականից։ Զբաղեցրել է տարբեր զորամիավորումներում բարձր պաշտոններ, ղեկավարել է տարբեր զորամասեր, որոնք եղել են ԶՈւ-րում լավագույնները՝ գնդապետ Ա Հարությունյանի ղեկավարությամբ։
«Եղել են ինձ ճնշելու փորձեր, բայց ռեկտորը հասկացել է, որ դա վատ հետեւանքներ կունենա ԵՊՀ–ի համար». Արայիկ Հարությունյան 
