Նեպալի Դաշնային Ժողովրդադեմոկրատական Հանրապետությունում՝ մայրաքաղաք Կատմանդուից 82 կմ հյուսիս-արևելք, ս.թ. ապրիլի 25-ին տեղի ունեցած երկրաշարժի զոհերի թիվը գերազանցել է 7 հազարը: Եվս 14 հազար մարդ վիրավոր է: Երկրաշարժի հիպոկենտրոնը 10 կմ խորն է եղել, իսկ էպիկենտրոնում ստորերկրյա ցնցման ուժգնությունը կազմել է 10 բալ: Ավերվել են բազմաթիվ շինություններ, առաջացել սողանքներ և ձնահյուսքեր, ընդհանուր առմամբ տուժել է 8 մլն մարդ;
Կա ջրի, սննդի, էլեկտրամատակարարման պակաս, որոշ վայրերում հնարավոր է համաճարակի բռնկում: Տեղի փրկարարների, ոստիկանության և զինված ուժերի հետ փրկարարական աշխատանքին մասնակցում են այլ երկրներից ժամանած որոնողափրկարարական թիմեր: Տարբեր երկրներ երկրաշարժից տուժած բնակչությանը մարդասիրական օգնություն են ուղարկում:
Հաշվի առնելով ՀՀ անդամությունը և մասնակցությունը ՄԱԿ-ի, միջազգային մարդասիրական այլ կառույցներին, հայ ժողովրդի ցավալի փորձը, Նեպալի ժողովրդի ցուցաբերած օգնությունը 1988 թ. Սպիտակի երկրաշարժից տուժած բնակչությանը և առհասարակ տուժած մարդկանց ու երկրներին օգնություն ցուցաբերելու ՀՀ որդեգրած քաղաքականությունը՝ ՀՀ կառավարությունն իր նախորդ` ապրիլի 30-ի նիստում որոշում է ընդունել մարդասիրական օգնություն տրամադրել Նեպալի երկրաշարժից տուժած բնակչությանը:
Երկու երկրների միջև եղած հեռավորությունը, երկրաշարժի վայրի դժվարամատչելիությունը նկատի ունենալով՝ նպատակահարմար է համարվել տրամադրել ֆինանսական օգնություն` 50 հազար ԱՄՆ դոլարին համարժեք դրամի չափով:
Կարեն Մկոյան
