Առողջապահության նախարարությունը այսօր ամփոփեց հունվարի 1-ից Հայաստանում իրականացվող սքրինինգային ծրագրի 4 ամիսների արդյունքները:

Խոսքը մասնավորապես վերաբերում է առավել տարածված ոչ վարակիչ հիվանդությունների կանխարգելմանն ու վաղ հայտնաբերմանը: Հրավիրված մամուլի ասուլիսին  ՀՀ առողջապահության փոխնախարար Սերգեյ Խաչատրյանն ասաց, որ սա պետության կողմից տարվող քաղաքականությունն է մարդկանց առողջության հարցում:

«Հիվանդությունների վաղ հայտնաբերումը և բուժումը, ինչպես նաև մարդկանց առողջության վերականգնումը ուղղակի ազդեցություն է ունենում երկրի տնտեսական զարգացման վրա»,- ասաց նա:

ՀՀ ԱՆ ծրագրերի իրականացման գրասենյակի տնօրեն Նելսոն Զուլոյանը նշեց, որ համաձայն Առողջապահության համաշխարհային կազմակերպության աշխարհում բնակչության հիվանդացությունների հիմնական պատճառը ոչ վարակիչ հիվանդություններն են: Նույնը կարելի է ասել նաև Հայաստանի մասին:

«Մեր երկրում հիվանդացությունների 80%-ը ոչ վարակիչ հիվանդություններն են, որից 50%-ը՝ սրտանոթային հիվանդությունը, 20%-ը՝ չարորակ նորագոյացությունները, 5%-ը՝ շաքարայի դիաբետը: Իրավիճակի թելադրանքով 2010-2011թթ.-ին կառավարությունը ընդունեց հայեցակարգ՝ համաձայն որի նախարարությունը պետք է իրականացներ ոչ վարակիչ հիվանդությունների հանրային իրազեկում, մասսայական հետազոտություններ, մասնագետների կրթում»,- ասաց նա:

«Զարկերակային ճնշման և շաքարային դիաբետի ախտորոշման թիրախային խմբերում ընդգրկված են 35-ից 68 տարեկան բոլոր քաղաքացիները, իսկ արգանդի պարանոցի քաղցկեղի ախտորոշման թիրախային խմբում՝ 30-60 տարեկան բոլոր կանայք: Հետազոտությունների տևողությունը եռամյա է, և մեր նպատակն է՝ ծրագրի ավարտին արձանագրել բնակչության 60 %-ի ցուցանիշ»,- ասաց նա: