Կենտրոն և Նորք-Մարաշ վարչական շրջանների ընդհանուր իրավասության դատարանում այսօր դատավոր Ալեքսեյ Սուքոյանի նախագահությամբ շարունակվեց ՀՀ նախկին նախագահ Ռոբերտ Քոչարյանի և նրա որդու՝ Սեդրակ Քոչարյանի հայցով նախնական դատական նիստը: Այն տեւեց 5 րոպե: Քոչարյանները դատի էին տվել «Ժամանակ» թերթի հրատարակիչ «Սկիզբ Մեդիա Կենտրոն» ՍՊ ընկերությանն ու «Առաջին լրատվական» ՍՊ ընկերությանը, եւ պահանջում են իրենց պատիվը և արժանապատվությունն արատավորող տեղեկությունների հերքում և վնասի հատուցում 5 միլիոն դրամի չափով,-այս մասին գրում է «Առավոտը»: Քոչարյանների ներկայացուցիչ Արփինե Մելիքբեկյանը դատարանից մեկ շաբաթ ժամանակ խնդրեց, ասելով, որ լրացուցիչ ապացույցներ պետք է ներկայացնի: Պատասխանող լրատվամիջոցների ներկայացուցիչ Նիկոլայ Բաղդասարյանն էլ ասաց, որ ցանկալի է, որ կողմը ապացույցները ուղարկի իրենց, որպեսզի կարողանան ծանոթանալ դրանց, իրենց դիրքորոշումն արտահայտելու եւ առարկություններ ներկայացնելու համար: Հայցվորը պատասխանողին դեռ որեւէ գրավոր ապացույց չի ներկայացրել: Դատարանը տվեց ժամանակ: Դատական նախնական հաջորդ նիստը նշանակվեց մայիսի 8-ին: