Հետընտրական զարգացումների մասին խոսելիս այսօր լրագրողների հետ հանդիպման ժամանակ Քաղաքագետների միության նախագահ Հմայակ Հովհաննսիսյանն ասաց, որ հասարակությունն է ոտքի կանգնել.«Սա Րաֆֆի Հովհաննսիյանը չի, սա հասարակությունն է, որ ոտքի է կանգնել»,-հայտարարեց Հովհաննիսյանն ու հավելեց, որ Րաֆֆի Հովհաննիսյանն ունի մի պրոբլեմ և այդ խնդիրն այն է, որ պետք է կարողանա այդ ալիքը պահել:
Ըստ Քաղաքագետների միության նախագահի Րաֆֆի Հովհաննիսյանին խանգարում է Երևանի ավագանու առաջիկա ընտրությունները և նա պետք է չմասնակցեր այս ընտրություններին՝ հնարավորություն տալով նախագահական ընտրություններին չմասնակցած քաղաքական ուժերին, որպեսզի նրանք մասնակցեին:
«Ապրիլի 9-ին Սերժ Սարգսյանը երդում է տալու Արտաշես Գեղամյանի, Վիկտոր Դալլաքյանի, Արթուր Բաղադասարյանի առաջ, իսկ Րաֆֆի Հովհաննիսյանը երդում է տալու ժողովրդի առջև», ասաց Հմայակ Հովհաննիսյանը և Սերժ Սարգսյանի երդմնակալությանը մասնակցող քաղաքական ուժերի մասին խոսելիս կանխատեսեց, որ ԲՀԿ-ն այդ օրը կմասնակցի կիսատ-պռատ:
Հմայակ Հովհաննիսյանն այսուհանդերձ նշեց, որ այնուամենայնիվ Սերժ Սարգսյանը պետք է Րաֆֆի Հովհաննիսյանի հետ գար համաձայնության, որպեսզի նշանակվեր արտահերթ խորհրդարանական ընտրություններ:
