Քիչ առաջ մարզահամերգային համալիրի մեծ դահլիճում մեկնարկեց Սիրուշոյի և ''Դորիանս'' խմբի` ''Միասին մեկ բեմում'' համերգը, որի ընթացքում լինելու են տարբեր երգեր` դուետներ, մեներգեր և իհարկե լինելու են անակնկալներ:

ArmStar.am-ին համերգից ժամեր առաջ հաջողվեց կուլիսների ետևում զրուցել  Սիրուշոյի հետ, ով անհամբեր սպասում է համերգի սկսվելուն: “Շատ տրամադրված եմ... սպասում եմ: Համերգին պատրաստվել ենք այնպես, ինչպես կպատրաստվեինք մենահամերգին և, քանի որ երկրից դուրս լինելու պատճառով հաճախ համերգներ չեմ ունենում այստեղ, ինձ համար շատ ավելի կարևոր է այս համերգը: Երկրպագուներիս վաղուց էի խոստացել հանդիպում”:

ArmStar.am-ի այն հարցին, թե Դորիանսի ու Սիրուշոյի համագործակցությունը կարո՞ղ է շարունական լինել, երգչուհին պատասխանեց, որ երաժշտությունը շատ անսպասելի մի բան է, որտեղ ամեն ինչ կարող է լինել: ''Այս համերգը Դորիանս խմբին ու Գոռին յուրովի աջակցելու տարբերակ է: Ամեն տարի, ինչպես բոլորը, հուսով եմ լինում, որ Եվրատեսիլում  կունենանք ավելի մեծ հաջողություններ և վերջապես բոլորի կողմից սպասվող հաղթանակը'':

Մենք փորձեցինք պարզել նաև, թե ինչպես է երգչուհին գնահատում ''Դորիանսի'' հաղթանակի հնարավորությունը: ''Կարծում եմ, որ Դորիանսը ինչ երգով էլ, որ հանդես գա Եվրատեսիլին, հաջողություն կունենա'':

Երգչուհին ArmStar.am-ին պատմեց նաև իր պլանների մասին: ''Այժմ պատրաստում եմ իմ նոր ձայնասկավառակը, որտեղ կան երգեր, օգտագործված են ռոքային գործիքներ, կա ռոքային տրամադրություն'':