«Հրապարակ» թերթը գրում է.

«Ազգային ժողովի ՀՀԿ-ական պատգամավոր Աշոտ Աղաբաբյանի հայտարարությունները հայտնվել են իրավապահների ուշադրության կենտրոնում: Մեր տեղեկություններով, իրավապահներն սկսել են ուսումնասիրել Բուռնաշի` իրեն դիտավորյալ սնանկացնելու մասին հայտարարությունները: Այդ ամենի հետևում պատգամավորը տեսնում է Գագիկ Ծառուկյանին և ֆինանսների նախարար Գագիկ Խաչատրյանին:

Այժմ պատգամավորն իր սնանկացման մեջ նրանց է մեղադրում, միևնույն ժամանակ շեշտում, թե ՀՀ նախագահին չի դիմել: Մեր տեղեկություններով, երբ Բուռնաշն այդ թեմայով փորձել է զրուցել Գագիկ Խաչատրյանի հետ, վերջինս ասել է՝ դիմիր առաջինին, այսինքն՝ նախագահին: Այժմ իրավապահներն սկսել են ուսումնասիրել նրա հայտարարությունները, սակայն դրանց ընթացք կտրվի այն ժամանակ, երբ պատգամավորը հաղորդում ներկայացնի հանցագործության մասին:

Սակայն Աղաբաբյանը երեկ «Ազատություն» ռադիոկայանի եթերում հայտարարեց, որ չի պատրաստվում դիմել իրավապահներին, քանի որ վստահ չէ, որ իրեն նման տեղեկություններ փոխանցած անձինք նախաքննության մարմինների մոտ կհաստատեն իրենց ասածը:

Մյուս կողմից, մեր տեղեկություններով, իրավապահները քննարկում են նաև «կեղծ սնանկացման» վարկածը: Սակայն բոլորը հետևում են՝ արդյոք ԱԺ նախագահ Գալուստ Սահակյանի կնոջ եղբայրը դուրս կգա՞ իշխանությունների դեմ՝ հանուն իր բիզնեսը փրկելու, թե՞ ոչ, կտեսնենք առաջիկայում»:

Ավելի մանրամասն կարդացեք թերթի այսօրվա համարում: