Ավետիսյանների ընտանիքի սպանության գործով տուժողների իրավահաջորդների ներկայացուցիչ փաստաբան Լուսինե Սահակյանն այսօր լրագրողներին տեղեկացրեց, թե սպանություն կատարելուց հետո Վլադիմիր Պերմյակովի մոտ նոթատետրում նամակ են գտել՝ ուղղված ծնողներին:

«Նամակում նա գրել է, թե այն, ինչ կատարվել է, դա ես չեմ արել, դա արել է իմ միջի մարդը: Նաև ինքը մանրամասն նկարագրում է, թե ինքը ինչ իրավիճակում է գտնվում այդ հանցագործությունը կատարելիս, ասում, որ իր սիրտը մեկ վայրկյանում հազար զարկ է կատարում և այլն»,-ասաց նա:

Լուսինե Սահակյանը նաև նշեց, որ փորձաքննության ժամանակ, երբ իրենք նույնպես ներկա են եղել, հոգեբանների ու հոգեբուժների հարցերին պատասխանելիս նա իրենց մոտ տարօրինակ տպավորություն է թողել:

«Մի առումով նա շատ խղճալի վիճակում էր, որովհետև նա ասում էր՝ ես չեմ կարողանում հասկանալ, թե ինչպես սպանեցի երեխաներին, որովհետև երեխաները իմ համար ծաղիկներ են և ես շատ եմ սիրում երեխաներին։ Դրա հետ մեկտեղ ասում էր, թե արել եմ, դե էսպես ստացվեց և ժպտում էր ամբողջ ընթացքում, երբ նկարագրում էր, թե ինչ է արել»,-ասաց նա:

Փաստաբանը նշեց, թե երբ նրան հարցրել են, թե իր հոգին չի ցավո՞ւմ այն բանի համար, որ արել է, Պերմյակովը բացասական պատասխան է տվել։

Նա վերջում ևս մեկ դրվագ ավելացրեց, թե ինչպես է Պերմյակովը ասել, որ ինքը հասկանում է, որ մեծ մեղք է կատարել, որ դա իր կյանքի վերջն է, բայց ուզում է, որ մարդիկ իրեն ներեն: