«Հրապարակ» թերթը գրում է.
«Վերջին շրջանում քաղաքական շրջանակներում, ինչպես նաև մամուլում, հաճախ շրջանառվում է հանրաքվեից հետո կառավարության արմատական փոփոխման հարցը: Ու թեև ոմանք պնդում են, որ այդ փոփոխությունների նախաձեռնողը գործող վարչապետ Հովիկ Աբրահամյանն է, սակայն, ՀՀԿ վերնախավի տեղեկություններով, չի բացառվում, որ առաջին զոհը հենց Հովիկ Աբրահամյանը լինի: Ըստ նույն աղբյուրների, այդ փոփոխությունը վաղուց է պատրաստվում Սերժ Սարգսյանի կողմից:
Ընդ որում՝ շրջանառվում է նաև նոր ընտրյալի անունը՝ ՀՀ նախագահի աշխատակազմի ղեկավար Վիգեն Սարգսյան: Այս տարբերակի օգտին խոսում են նաև այն անհերքելի փաստերը, որ նախագահը հենց Վիգեն Սարգսյանին է վստահում ամենամասշտաբային և կարևորագույն պետական ծրագրերի իրականացումը՝ սկսած Հայոց ցեղասպանության 100-րդ տարելիցի պետական մեծածավալ միջոցառումներից և ավարտած նրանով, որ հենց աշխատակազմի ղեկավարին է վստահվել սահմանադրական հանրաքվեի «այո»-ի քարոզչության ղեկավարի պաշտոնը:
Մոտալուտ փոփոխման հեռանկարները բավականին նյարդայնացնում են գործող վարչապետին և արդեն իսկ կոնկրետ գործողությունների մղում: Մասնավորապես հայտնի է դարձել, որ քաղաքական ինտրիգներում տասնամյակներ շարունակ հմտացած Հովիկ Աբրահամյանն իր վերահսկողության տակ գտնվող լրատվամիջոցների ղեկավարներին հրահանգել է դեկտեմբերի 6-ից հետո թիրախ դարձնել իր հավանական մրցակից Վիգեն Սարգսյանին»:
Ավելի մանրամասն կարդացեք թերթի այսօրվա համարում:
