Քիչ առաջ Ազատության հրապարակում ելույթ ունենալով ԱԺ ԲՀԿ խմբակցության քարտուղար Նաիրա Զոհրաբյանը դիմելով հանրահավաքի մասնակիցներին հարցրեց, թե արդյո՞ք այլևս այսպես պետք է շարունակեն և ինքն էլ պատասխանելով հարցին ասաց. «Այսպես շարունակել չի կարելի: Մենք երկիր ենք կորցնում»:
Ինչպես Ազատության հրապարակից փոխանցում է YerevanNews.am-ի թղթակիցը, Նաիրա Զոհրաբյանն իր խոսքում անդրադարձավ ԱՎԾ հրապարակած վերջին տնտեսական տվյալներին, որոնք որակեց տնտեսագիտական խայտառակ նոնսենս:
«Սիրելի ժողովուրդ երկիրը հասցված է սոցիալ-տնտեսական անդունդի, մենք ունենք հնարավորություն ձեզ հետ միասին նոր էջ բացել Հայաստանի, Երևանի պատմության մեջ»,-ասաց Նաիրա Զոհրաբյանն ու հավելեց, որ տեր են կանգնելու ժողովրդի քվեին:
«Մենք ուժեղ ենք ձեզանով, մենք կարող ենք հաղթել»,- եզրափակեց Նաիրա Զոհրաբյանը:
Այս պահին հանրահավաքը շարունակվում է:
