«Ժողովուրդ» օրաթերթը գրում է.

«Հայ-ադրբեջանական շփման գծի ողջ երկայնքով անցած շաբաթ և կիրակի օրերին հակառակորդը պարբերաբար խախտել էր զինադադարի ռեժիմը: Հայկական զինուժը պատժիչ գործողություններով թշնամուն պարտադրել է վերադառնալ զինադադարի ռեժիմին: Բարեբախտաբար այս անգամ հայկական կողմը զոհեր չի ունեցել:

Հրետակոծման արդյունքում վիրավորվել են Թաղավարդ գյուղի բնակիչ, 1989թ. ծնված Երվանդ Կարոյի Ֆիրյանը և Բերքաբեր գյուղի 55-ամյա բնակիչ Նորիկ Ալիխանյանը: Փոխարենը ադրբեջանական կողմն ունի առնվազն երկու զոհ: Երեկ արդեն ադրբեջանական լրատվամիջոցները հաստատեցին, որ զոհվել են լեյտենանտ Զոիլֆուգարլ Գալիբ Լաիմօղլուն և շարքային Հաջըև Գեֆերլի Ինթիգամօղլուն:

Այսպիսով, հերթական անգամ պիտի արձանագրենք, որ այն ժամանակ, երբ Հայաստանը և Արցախը նշում էին Սուրբ Զատիկի տոնը, ադրբեջանական կողմը փորձել է «համը հանել»:

Դրան գումարվել է նաև Սերժ Սարգսյանի՝ ԱՄՆ մեկնելու փաստը, որտեղ ԼՂՀ խնդրին ևս անդրադարձ է լինելու: Թերևս հենց այդ փաստով է պայմանավորված եղել այն հանգամանքը, որ ադրբեջանական կողմը ոչ միայն խոշոր տրամաչափի հրետանի է գործի դրել, այլ նաև հրթիռային կայաններով հրետակոծել է բնակավայրերը: Բայց այն փաստը, որ արդյունքում մենք զոհեր չունենք, վկայում է այն մասին, որ ոչ միայն մեր բանակն է նոր իրավիճակին լիարժեք տիրապետում, այլ նաև սահմանամերձ գյուղերի բնակիչները»:

 

Մանրամասները կարդացեք թերթի այսօրվա համարում: