«Հայկական ժամանակ» թերթը գրում է.

««Էներգետիկայի և բնական պաշարների նախարարությունում ստեղծված աշխատանքային խումբը, որ պետք է զբաղվեր «Նաիրիտ» գործարանի վերագործարկման հնարավորության քննարկմամբ և ներդրող փնտրելու գործով դադարեցրել է իր աշխատանքները։ Այդ մասին երեկ մեզ հայտնեց գործարանի նախկին աշխատակիցներից Կարինե Շահվերդյանը։ Վերջինս փոխանցեց նաև, որ այդ խումբն իրականում ձևավորվել էր ընդամենը պոտենցիալ ներդրող հանդիսացող ռուսական «Ռոստեխ» ընկերության ուղարկած հարցաթերթիկը լրացնելու համար։ «Խումբը նրա համար է, որ վերագործարկման ծրագիր ներկայացներ ռուսական կողմին։ Այն գրեթե չի գործել, 2 անգամ հանդիպում է եղել, Կառավարության ներկայացուցիչները հանձնաժողովի կազմում ընդգրկված 5 նաիրիտցիներին ներկայացրել են պատրաստի ծրագիր և այն փոխանցել նախարարին»,– ասաց Շահվերդյանը։ Նախարարությունում ստեղծված աշխատանքային խմբի անդամներից գործարանի նախկին տնօրեն Կարեն Իսրայելյանը մեզ հետ զրույցում ասաց. «Այդ խումբն ընդամենը 3-4 հանդիպում անցկացրեց, եզրակացություն կազմեց, որի տակ մենք՝ «Նաիրիտի» աշխատակիցներս, չստորագրեցինք, որովհետև տարաձայնության ունեինք կազմված ծրագրի հարցում։ Այնտեղ վերագործարկման մասին ոչինչ չկար, միայն «Նաիրիտի» պատմությունն էր և վերագործարկման հնարավորության հաստատումը»։

Ստացվամ է, որ նորանշանակ նախարար Լևոն Յոլյանի հանձնարարությամբ ստեղծված աշխատանքային խումբը հերթական քայլն էր տպավորություն ստեղծելու, թե գործարանի վերագործարկման ուղղությամբ գործ է արվում։ Եվ հերթական անգամ հստակ դարձավ, որ սա աչքկապոցի էր, ինչպես եղավ Աժ-ում ստեղծված Աժ տնտեսական հարցերի մշտական հանձնաժողովի ենթակայությամբ ստեղծված «Նաիրիտի» հարցերով զբաղվող ենթահանձնաժողովի դեպքում, որն աշխատանքները պիտի ամփոփեր 2015թ. սեպտեմբերին, այնինչ արդեն 2016 –ն է:

Ու չնայած «Նաիրիտի» հարցով իշխանության, Կառավարության այս հետևողական աչքկապոցիին, տեսանելի է, որ գործարանը աստիճանաբար գնում է լիակատար փակման։ Օրերս հայտնի դարձավ, որ գործարանի 460 աշխատակիցներ հուլիսի 1-ից աշխատանքից ազատման վերաբերյալ ծանուցում են ստացել։ Փետրվարին աշխատանքից ազատվել էին ևս 2200-ը։ Մեր տեղեկություններով այս 460 աշխատակիցների մի ահագին մասը պահակներն են, որոնց փոխարեն առաջիկայում գործարանը հսկելու է «Արմոբիլ» անվտանգության ծառայությանը։ Սա ենթադրում է, որ գործարանի «պահակությանը» հանձնվում է մեկ ընկերության»:

Ավելի մանրամասն կարդացեք թերթի այսօրվա համարում: