ՀՀ գյուղատնտեսության նախարար Սերգո Կարապետյանը, ԱԺ-ում լրագրողների հետ զրույցում անդրադառնալով իր ղեկավարած գերատեսչության գործունեությանը վարչապետ Հովիկ Աբրահամյանի կրճատումներին վերաբերող հայտարարությունից հետո, նշեց, թե իրենք շատ լուրջ խնայողություններ են արել հենց առաջին տարվանից սկսած:

«2011թ-ից, երբ ես սկսել եմ աշխատել, մեր մոտ էդ ծախսերը կտրուկ նվազել են, գնումների առումով խնայողություններ ենք ունեցել: Շատ լուրջ խնայողություններ եղել են հենց առաջին տարվանից սկսած: Տարիների ընթացքում մենք հասել ենք այնպիսի մակարդակի, որ այդ գնումների հարցում ընդհանրապես իջեցնելու տեղ էլ չունենք: Դուք կարող եք հետաքրքրվել բոլորից, կոռուպցիան մեզ մոտ նվազագույնի է հասցված, մեր համակարգից հետաքրքրվեք, լրագրողական հետաքննություն անցկացրեք, ինքներդ էլ կարող եք համոզվել»,-ասաց նա:

Գյուղնախարարը նշեց, թե գործուղումներն իրենց մոտ շատ սահմանափակ են:

«Ես առաջին օրվանից, երբ ես սկսել եմ աշխատել, միայն էկոնոմ կլասով եմ գնացել գործուղումների, և մեկ հոգի է ուղեկցել ինձ»,- ասաց նախարարը` հավելելով, որ իր ողջ կյանքում տնտեսություն է ղեկավարել:

«Պայքարել եմ հոսանքի ավելորդ ծախսի դեմ, ջրի դեմ, ամեն ինչի դեմ: Ես միշտ պայքարել եմ, որ խնայողություններ լինեն: Երբ ես եկա նախարարություն, ես ջղայնանում էի, երբ ցերեկը լույսերը վառ են թողնում: Իմ էությամբ ես այդպիսին եմ: Վերանորոգչական ծախսեր արել եմ իմ հաշվին, առաջին տարին, որ եկել եմ, տուալետները, ամբողջ միջանցքը, բակը, նկարներ կան վերանորոգել եմ, իմ աշխատավարձի հաշվին, երբ նոր էի եկել, ընդամենը մեկ շաբաթ հետո, ես հլը նախարարի աշխատավարձ չէի ստացել»,- ասաց նախարարը և ընդգծեց` նույնիսկ այս պայմաններում էլ սեղմելու տեղ կա:

«Կրճատվելու են նաև աշխատողները: Հիմա, ենթադրենք, ունենք թափուր տեղեր, էլ չենք լրացնի էդ տեղը: Մենք ունենք նաև ՊՈԱԿ-ներ, ենթակա ձեռնարկություններ: «Հայանտառ» ՊՈԱԿ ունենք, որտեղ մենք ունենք վաթսուն հոգի կրճատում: «Հայ Անտառ»- ՊՈԱԿ-ում աշխատում է 950 մարդ»,- ասաց նա:

Հարցին, եթե աշխատողները կրճատվեն, անտառահատումների դեպքերը չե՞ն շատանա, Կարապետյանը պատասխանեց. « Ինչքան պահակներին շատ կրճատենք, էնքան կպակասի»: