«Հայկական ժամանակ» թերթը գրում է.
«Պաշտպանության նախարարությունը շարունակում է մնալ ամենաթանկ ավիատոմսեր ձեռք բերող գերատեսչությունը: Օրինակ, ՊՆ-ն սեպտեմբերի 11-16-ը Երևան-Վիլնյուս-Երևան չվերթի համար ձեռք է բերել 4 ավիատոմս, հատը՝ 517 հազար դրամով:
Մինչդեռ եթե նույն ուղղությամբ այսօր որևէ ավիաընկերությունից փորձես տոմս ձեռք բերել, ասենք՝ հոկտեմբերի 1-6-ի համար, այն կարժենա 194-215 հազար դրամ՝ մոտ 2,5 անգամ էժան: Նույն օրերին ՊՆ-ն Երևան-Բրյուսել-Երևան չվերթի 3 տոմս է ձեռք բերել, յուրաքանչյուրը՝ 478 հազար դրամ արժեքով: Այսօր շուկայից կարելի է այդ չվերթի տոմսը ձեռք բերել 175-220 հազար դրամով: Կամ Երևան-Լոնդոն-Երևան չվերթի տոմսը գնել է 523 000 դրամով: Այն հնարավոր է գնել 216-240 հազար դրամով:
Ընդ որում, նշված է, որ ՊՆ-ն էկոնոմ դասի տոմսեր է գնել, բայց դրանք ունեն բիզնես կամ առաջին դասի արժեք:
Պարզվեց, որ ՊՆ պաշտոնյաները պետության հաշվին գերադասում են օգտվել եվրոպական թանկարժեք և ոչ թե ուկրաինական կամ ռուսական անհամեմատ մատչելի ավիաընկերություններից:
Բացի այդ, չի բացառվում, որ գնվում են առաջնակարգ դասերի տոմսեր, բայց փաստաթղթերում նշվում է էկոնոմ դաս: Գուցե ՊՆ պաշտոնյաները ավիաընկերությունների հետ միասին «պրիմիտիվ գողությո՞ւն» են կատարում բյուջեից»:
Ավելի մանրամանս կարդացեք թերթի այսօրվա համարում:
