«Միլանի» գլխավոր մարզիչ Ջենարո Գատուզոն մեկնաբանել է այն փաստը, որ միլանյան ակումբի երկրպագուներն Իտալիայի Գավաթի 1/8 եզրափակչի` «Վերոնայի» հետ խաղում դարպասապահ Ջանլուիջի Դոնարումայի դեմ ուղղված պաստառ էին պարզել:

Պաստառի վրա գրված է եղել հետևյալը. «Բարոյական նվաստացում տարեկան 6 մլն եվրոյի տեսքով և որպես լրացում` եղբայր-ձրիակեր: Չքվիր, մեր համբերությունը սպառվել է»:

Ավելի վաղ ԶԼՄ-ները հայտնում էին, որ գործակալ Մինո Ռայոլան, ով ներկայացնում է Դոնարումայի շահերը, դիմել է ակումբի ղեկավարությանն ու խնդրել դադարեցնել ամռանը դժվարությամբ կնքված պայմանագիրը: Գործակալը կարծում է, որ «Միլանը» պետք է չեղարկի պայմանագիրը ֆուտբոլիստի նկատմամբ «բարոյական ճնշման» պատճառով: Դոնարուման ևս նամակ է գրել «Միլանի» ղեկավարությանը և հայտարարել, որ իր վրա հոգեբանական ճնշում է գործադրվում.

«Նա 18 տարեկան է և, իհարկե, զարմացած էր: Ես կարող եմ միայն շնորհակալություն հայտնել նրան այն ամենի համար, ինչ նա անում է: Իր տարիքի համար նա աշխարհի լավագույն դարպասապահն է: Դուք կարող եք ասել, որ նա երջանիկ տեսք չունի, ես գիտեմ նրան` որպես մեծ մարզիկ և հիանալի մարդ: Կպաշտպանեմ նրան, ինչպես կարողանամ:

Ես շատ եմ վախենում, քանի որ մարդիկ այնպիսի բաներ են գրում, կարծես` նա հրեշ է, նա դրան արժանի չէ: Բարեբախտաբար, այսօր մարզադաշտում ընդամենը 9 հազար մարդ կար, պատկերացրեք` ինչ կլիներ, եթե նրան 50 հազար հանդիսական վիրավորեր»,- Գատուզոյի խոսքերն է փոխանցում «Rai Sport»-ը: