Այսօր Կենտրոն և Նորք–Մարաշ համայնքների ընդհանուր իրավասության առաջին ատյանի դատարանում կայացած դատական նիստից հետո ամբաստանյալ Վարդան Սեդրակյանի պաշտպան Ալիկ Սիրունյանից փորձեցինք պարզել, թե ինչի հետ էր կապված վերջերս մամուլում շրջանառված և նրա կողմից արված այն հայտարարությունը, թե իրենք ոչ մի փոխհատուցում չեն պահանջելու դատավարության ավարտից հետո, եթե դեռևս պարզ չէ, թե ինչ դատավճիռ կկայացվի: Փաստաբանը պատասխանեց, որ ամեն ինչ պարզից էլ պարզ է, և իր վստահորդին շուտով անմեղ են ճանաչելու: «Oրենքով փոխհատուցման մասին խոսք չկա, ինձ հարց են տվել լրագրողները, ես էլ պատասխանել եմ: Եթե օրենքում կետ լիներ, որ մենք չմասնակցեինք նիստերին, մինչև մեր մասին խոսք լինելու պահը գար, այդ ժամանակ մենք սիրով կօգտվեինք օրենքից, սակայն քրեական օրենսգրքում նման բան չկա: Պարզապես մի քանիսին պետք է եղել քաղաքական կլոունադա սարքել և Սեդրակյանին խցում տեսնել, նրանք էլ արել են իրենց ուզածը: Մի քանի ամիս մենք կդիմանանք: Մենք լսել ենq 11 վկաների, սակայն ոչ մի տեղ դեռևս չնկատեցինք Վարդան Սեդրակյանին, միայն իմացանք, որ կրակոցից հետո Պարույր Հայրիկյանը կրակոցից հետո վայր է ընկել, բայց սա մեզ ի՞նչ է տալիս», ասաց պաշտպան Սիրունյանը: Լրագրողի այն հարցին, թե ի՞նչ կարծիք ունի փաստաբանը Հայրիկյանի այն հայտարարության հետ կապված, որ ինքը պատրաստ է օգնել Խաչիկ Պողոսյանին և ոչ մեկին չի ցանկանում տեսնել ամբաստանյալի կարգավիճակում, Սիրունյանը պատասխանեց, որ չգիտի:
Սեդրակյանը քաղաքական կլոունադայի զոհ է դարձել. Սիրունյան
