Պաշտպանության նախարարությունը առարկություն է ներկայացրել զորացրված զինծառայող Ռազմիկ Պետրոսյանի ներկայացրած հայցի դեմ, որն այժմ քննվում է Վարչական դատարանում: Այս մասին NEWS.am-ին հետ զրույցում ասաց Ռազմիկ Պետրոսյանի փաստաբան Աշխեն Դաշյանը:

Նշենք, որ զորացրված Ռազմիկ Պետրոսյանը Վարչական դատարան հայցը ներկայացրել էր դեկտեմբերի 5-ին՝ ՊՆ-ից պահանջելով զինգրքույկում համապատասխան գրառում կատարել ապրիլյան պատերազմի մարտական գործողություններին մասնակցելու մասին։

Փաստաբանի կարծիքով ՊՆ ներկայացրած առարկությունները որեւէ հստակ հիմնավորում չունեն եւ «ծիծաղելի» են:

«Իրենք նշում, են գործողության կատարման հայցով ենք դիմել, մենք պիտի ապացուցենք, որ Ռազմիկ Պետրոսյանը մասնակցել է ռազմական գործողություններին: Տեսականորեն չի կարող այդպիսի ապացույց գոյություն ունենա, որ մարտի դաշտում ինչ-որ գործողություն կատարելիս զինվորը կարողանա ինչ-որ ապացույց ներկայացնել, այսինքն` աբսուրդ է, որ նման ապացույց կարողանա զինվորը ներկայացնել: Եւ ՊՆ ներկայացրած երկրորդ աբսուրդային առարկությունն այն է, որ ինչ վերաբերում է հայցվորի այն պնդմանը, որ ինքն ականատես է եղել ամբողջ մարտին, կամ կիրառել է իրեն ամրակցված զենքը դեռեւս չի նշանակում, որ վերջինս մասնակցել է մարտական գործողություններին, ու նշվում է, որ զենքը կարելի է օգտագործել նաեւ մարտական հերթապահության ժամանակ: Սա բացարձակ աբսուրդի ժանրից է, այսինքն իրենք ընդունում են այն փաստը, որ զինվորը է կիրառել զենքը, ականատես է եղել մարտին, բայց դա դեռ չի նշանակում գործողություն կատարել: Այս դեպքում հարց է առաջանում` այլապես ինչ ձեւով կարելի է ապացուցել այդ փաստը: Իմ կարծիքով` ոչ մի զինվոր մարտի չի գնում տեսագրության, կամ ձայնագրության սարքերով` մտածելով, որ հետո ՊՆ-ն կարող է կասկածի տակ դնել իր մասնակցությունը»,-ասաց պաշտպանը:

Պն ներկայացրած հաջորդ առարկությունը, ըստ փաստաբանի, վերաբերում է նրան, որ մարտական հերթապահությունը եւ մարտական գործողությունը տարբեր բաներ են եւ Ռազմիկ Պետրոսյանը միայն մարտական հերթապահություն է իրականացրել. «Այդ դեպքում հարց է առաջանում, ինչու է Ռազմիկ Պետրոսյանի մարտական հերթապահությունը 15 օրվա փոխարեն 3 ամիս մնացել դիրքերում` մինչեւ զորացրվել: Այսինքն եթե չկար մարտ, զինվորը իրավունք չուներ այդքան երկար մնար դիրքերում, այսինքն` եղել է մարտ, եղել է առաջադրանք, որ այդքան երկար մնացել է դիրքերում»:

Պաշտպանը հավելեց, որ եթե տեսականորեն իրենք ընդունեն, որ գործողության չի մասնակցել, բայց Ապրիլյան քառօրյայի օրերին լինել դիրքերում, դա ավտոմատ համարվում է արդեն մասնակցություն եւ դա նաեւ սահմանվում է Ժնեւի կոնվենցիայով:

Փաստաբանը նշեց, որ ՊՆ-ն նաեւ չի պատասխանել իրենց այն հարցադրմանը, թե ինչու է Ռազմիկ Պետրոսյանը 3 ամիս շարունակ մարտական հերթապահություն կատարել, թե ռազմական գործողությունների չի մասնակցել:

Նշենք, որ Ռազմիկ Պետրոսյանը որեւէ արտոնությունից չի ցանկանում օգտվել, քանի որ գտնվում է արտերկրում, ուղղակի ցանկանում է վերականգնել իր իրավունքները եւ արդարությունը:

 Նյութի աղբյուրը՝ NEWS.am