Այս պահին ուսուցիչների ու գիտնականների աշխատավարձերի բարձրացում նախատեսված չէ: Այս մասին, այսօր՝ նոյեմբերի 5-ին, ՀՀ Ազգային ժողովի գիտության, կրթության, մշակույթի, երիտասարդության եւ սպորտի հարցերի ու ֆինանսավարկային եւ բյուջետային հարցերի մշտական հանձնաժողովների համատեղ նիստում հայտարարեց ԿԳ նախարարի պաշտոնակատար Արայիկ Հարությունյանը:
«Ես հույս ունեմ, որ օպտիմալացումների ճանապարհով այդ խնդիրը կլուծվի: Վերջերս ինձ այցելել էին 4 ուսուցիչ, որոնք դասավանդում են նույն դպրոցում «տեխնոլոգիա» առարկան: Մեկն ուներ շաբաթական 4 ժամ, մեկը՝ 5 ժամ, մեկը՝ 6 ժամ, մյուսը՝ 7 ժամ: Նրանք բողոքում էին, որ տնօրենը փորձում է միավորել այդ մի դրույքը: Այդ 4-5-6 ժամերի համար չնչին աշխատավարձեր են ստանում ուսուցիչները: ԿԳՆ-ն պետք է դադարի սոցիալական ծրագրեր լուծող նախարարություն լինելուց, այլ լինի կրթության քաղաքականություն վարող նախարարություն: Տասնամյակներ շարունակ չենք անդրադարձել այս խնդրին: Ես վստահ եմ, որ եթե ուսուցիչը 4 ժամ է դասավանդում ու ստանում 10 հազար դրամ, դրանից նրա արդյունավետությունն էլ է ցածր, նա նաեւ սոցիալական խնդիր չի լուծում այդ 10 հազար դրամով»,-ասաց նախարարի պաշտոնակատարը:
Ինչ վերաբերում է նրան, որ նման քայլի հետեւանքով բազմաթիվ ուսուցիչներ կզրկվեն աշխատանքից, Արայիկ Հարությունյանն ասաց. «Մենք հիմա մտածում ենք վերապատրաստումների մասին, որ դուրս մնացածները այլ ոլորտներում գտնեն իրենց աշխատանքը»:
Նա նշեց, որ կառուցվածքային փոփոխություններ տեղի են ունենալու նաեւ նախարարություններում. «Ես անձամբ հիմա յուրաքանչյուր վարչության գնահատմամբ եմ զբաղված եւ առաջնային դիտարկումները ցույց են տալիս, որ այստեղ էլ օպտիմալացնելու տեղ ունենք»:
Ռուսաստանն «Орешник» բալիստիկ հրթիռ է արձակել Ուկրաինայի ուղղությամբ. ՌԴ նախագահ 
