Իմ սիրուն աչքերի համար չեն ինձ ընտրել ռեկտոր, ես ճանապարհ ունեմ անցած, ռեկտորատում աշխատում եմ 1993 թվականից, բոլոր օղակներով անցել եմ. 5 տարի պրոռեկտոր եմ եղել եւ 13 տարի ռեկտոր: Այս մասին այսօր՝ փետրվարի 28-ին, ԵՊՀ հոգաբարձուների խորհրդի նիստից հետո լրագրողների հետ զրույցում նշեց ԵՊՀ ռեկտոր Արամ Սիմոնյանը: Նիստի օրակարգում ռեկտորին անվստահություն հայտնելու հարցն էր, սակայն այն հետաձգվեց:
«Այսինքն ես ունեմ փորձ, ես պրոֆեսոր եմ, ակադեմիայի թղթակից անդամ եմ, կրթությունը շատ լավ գիտեմ, որպես դասախոս էլ վատ չեմ: Իհարկե, ես կունենամ թերություններ, որովհետեւ համալսարանը շատ դժվար ղեկավարվող հիմնարկ է: Այստեղ կա 3,5 հազար աշխատող եւ 17 հազար ուսանող»,-ասաց ռեկտորը:
Նա պատմեց 19-րդ դարի ամերիկյան համալսարաններից մեկի ռեկտորի հետ կապված մի պատմություն ու ասաց. «Սատկած շանը փայտով չեն խփում: Հիմա ինձ, որ այսպես հալածում են, եթե ես լինել խեղճուկրակ, համալսարանից ինձ հանելը մեկ օրվա գործ էր»:
ԵՊՀ ռեկտորն ասաց, որ ինքը ԿԳ նախարար Արայիկ Հարությունյանի հետ համալսարանում աշխատած տարիներին չի շփվել:
«Մի երկու անգամ տեսել եմ, գնացել եմ իրենց դեկանի հաշվետվությանը: Իմիջիայլոց, իր աշխատանքի ընդունման հրամանը ես եմ ստորագրել: Դեկանը եկավ ասաց՝ լավ երիտասարդ կա, որպես արաբագետ լավն է, իսկ մենք արաբագիտության ոլորտում ունեինք կադրերի պակաս: Ես լսելով դեկանի բացատրությունները, նաեւ խոսելով ամբիոնի վարիչի հետ, հրամանագրել եմ: Մենք ուրիշ կապով կապված չենք եղել: Ես չեմ փոշմանել: Իմ խորին համոզմամբ, անձնական վրեժխնդրությունը մեծագույն հիմարություն է: Մանավանդ ազատ համալսարանական աշխարհում նման գործելաոճը աղետի է բերում»,-հայտարարեց Արամ Սիմոնյանը:
Սուրեն Չախալյան․ Ցավոք, ֆուտբոլը դաժան է, մեկ սխալը բերում է այսպիսի արդյունքի 
