Yelaket.am-ի զրուցակիցն է դերասանուհի Թամարա Պետրոսյանը, որը կիսեց մեզ հետ իր խոհերը ամենամեծ հիասթափության, գրական հերոսուհու մարմնավորելու, հարգանքի, սիրո և ընկերության մասին:

 -Ո՞րն է դերին նախապատրաստվելու Ձեր մեթոդը:

-Ամենակարևոր նախադրյալը տրամաբանությունն է։ Տրամաբանության վրա են կառուցվում մնացած բոլոր գույները։

-Մասնագիտության մեջ ի՞նչն է դերասանուհուն ամենամեծ հիասթափությունը պատճառում:

-Դժվարանում եմ պատասխանել: Պատճառները կարող են տարբեր լինել. զայրացնում է գործին ոչ պրոֆեսիոնալ մոտեցումը դիմացինի կողմից , կարող է նաև հիասթափեցնել , եթե անընդհատ շրջապատված լինես նման մարդկանցով ։

-Ասում են՝ հանդիսատեսի առաջ հագուստով երևալը գեղարվեստ է, իսկ մե՞րկ երևալը...

-Նույնպես գեղարվեստ է։ Երկու դեպքում էլ կարևոր է ճշգրիտ ու դիպուկ գեղարվեստական արդարացումը։

-Ինչպիսի հատկանիշներով պետք է օժտված լինի անձը, որպեսզի ձեր ընկերը դառնա:

-Բոլոր ընկերներիս շատ սիրում եմ։ Այ հիմա մտածում եմ՝ ինչի՞ համար եմ նրանց սիրում… չեմ կարող ստույգ հատկանիշներ նշել: Սիրում եմ, որովհետև իմն են, իսկական են, լավն են, բարի են, կարևոր պահերին միշտ կողքիս են և դա փոխադարձ է։ Ընդհանրապես ընկերությունն իմ կյանքում շատ մեծ ու կարևոր տեղ է զբաղեցնում։ Ամենաուրախ մարդն եմ լինում, երբ ազատ ժամանակս անց եմ կացնում ընկերներիս հետ։

-Ո՞ր գրական հերոսուհուն սիրով կմարմնավորեիք:

-Հիմա մեծ հաճույքով կմարմնավորեի Լարային ` «Դոկտոր Ժիվագո»-ից։ Վաղը կամ մյուս օրը կարող է ցանկությունս փոխվի :

-Ո՞ր գրական ստեղծագործությանը կնմանեցնեիք ձեր կյանքը:

-Չեմ կարծում, թե իմ կյանքը նման է որևէ գրական ստեղծագործության, համենայնդեպս, դեռ նման ստեղծագործության չեմ առնչվել։

-Հարգանքը չեզոքացնու՞մ է սերը:

- Ինձ թվում է սերը ծնում է հիացմունք, հարգանք և էլի շատ դրական էմոցիաներ, որոնք միայն ամրապնդում են սերը։

-Ի՞նչն է ամենաշատը խանգարում սիրավեպին:

-Չգիտեմ։ Մի՞գուցե փոխըմբռնման բացակայությունը։

-Ի՞նչն է կնոջ հոգեբանության միակ լաբորատորիան:

-Իմ պարագայում՝ ուղեղը:

-Ի՞նչն է կնոջը լիարժեք երջանիկ դարձնում:

-Ներդաշնակությունը: Երբ ամեն ինչից ունենում ես և քեզ լիարժեք ես զգում։

Նյութը պատրաստեց Նարինե Պետրոսյանը: