Ղրղզստանի և Չինաստանի սահմանին մինչև 5,6 մագնիտուդով մի քանի երկրաշարժ է տեղի ունեցել, հայտնում է հետխորհրդային հանրապետության սեյսմոլոգիայի ինստիտուտը։
Ըստ դրա տվյալների՝ առաջին ցնցումն ամենաուժեղն էր։ Ժամը 02:01-ին երկրաշարժի ուժգնությունը կազմել է 5,6 մագնիտուդ։ Դրանից հետո տեղի է ունեցել 4-ից 5 բալ ուժգնությամբ երկրակեղևի թրթռումների հերթական շարքը։ Վերջին ցնցումը գրանցվել է ժամը 14։17-ին։
Սեյսմոլոգները պարզել են, որ ստորգետնյա ցնցումների էպիկենտրոնը գտնվել է Չինաստանում՝ հունվարի 23-ին 7 մագնիտուդ ուժգնությամբ հզոր երկրաշարժի վայրի մոտ։ Սակայն բոլոր ստորգետնյա ցնցումները զգացվել են նաև Ղրղզստանում։ Էպիկենտրոնին ամենամոտ գտնվող Ղրղզստանի բնակավայրերում երկրակեղևի տատանումների ինտենսիվությունը տատանվել է 2,5-ից 4,5 բալ:
Ղրղզստանի սեյսմոլոգիայի ինստիտուտի տվյալներով՝ հունվարի 23-ի գիշերը տեղական ժամանակով ժամը 00.09-ին Չինաստանում Ղրղզստանի սահմանի մոտ՝ Բիշքեկից 339 կիլոմետր հեռավորության վրա, տեղի է ունեցել 7 մագնիտուդով երկրաշարժ։ Առաջին ամենաուժեղ ցնցումից հետո հաջորդել են մոտ տասը հետցնցումներ՝ 3-ից 6 բալ ուժգնությամբ։
Հանրապետության արտակարգ իրավիճակների նախարարության փոխանցմամբ՝ Ղրղզստանի տարածքում տեղի ունեցած ցնցումների հետևանքով զոհեր և վիրավորներ չկան։
Տավուշում զինծառայողներ են միացել ճանապարհը փակ պահող քաղաքացիներին 
