Ինչպես արդեն տեղեկացրել էինք, այսօր ակտիվիստները նստացույց էին կազմակերպել քաղաքապետարանի դիմաց և ներկայացրել էիհն իրենց պահանջները: Թե որքանով է սա արդարացված և ճիշտ, YerevanNews.am-ի թղթակիցը փորձեց պարզել քաղտեխնոլոգ Կարեն Քոչարյանի հետ հարցազրույցում:

 -Պրն Քոչարյան, ինչպե՞ս եք վերաբերվում այն հանգամանքին, որ երիտասարդները հաղթանակի հասնելուց հետո կրկին հավաքվել են քաղաքապետարանի դիմաց և նստացույց են կազմակերպել՝ ներկայացնելով իրենց պահանջները, այդ թվում՝ 5 օր երթուղու գինը նշանակել 50 դրամ՝ որպես փոխհատուցում նախորդ 5 օրերի 150 դրամ վճարելուն:

 -Քանի որ նրանք երիտասարդ են և նման բան չէին տեսել, հետևաբար դա նրանց մոտ ադրենալինի բարձրացում կարելի է անվանել: Իսկ այդ ադրենալինն ինչ-որ ձև պետք է ծախսվեր: Էրեխեքը հավեսի են ընկել: Երբ շարժումը պատահական կտրվեց, դրանից այդ ադրենալինը միանգամից չէր կորչի:

 

-Լուրեր են տարածվել, որ այս ամենը կարող է քաղաքանացված լինել ինչ-որ քաղաքական կուսակցությունների կամ անհատ քաղաքական գործիչների կողմից: Ի՞նչ եք կարծում՝ հնարավո՞ր է նման բան:

 -Ես չեմ բացառում այս տեսակետը: Հաստատ համոզված չեմ, բայց դա կարող է լինի տարբերակներից մեկը, որ, օգտագործելով այդ էրեխեքին, փորձում են ընդհամենը շարժումը տաք պահել՝ ինչ-ինչ բաներից ելնելով:  Դրանց թվում կարող են լինել և քաղաքական գործիչներ և ՀԿ-ներ: 

Եթե նկատել եք՝ քաղաքական որոշ ուժեր փորձեր արեցին, սակայն ով մտավ, արագ դուրս եկավ: Կային բաներ, որոնք չէին ուզում քաղաքականացնել: Ես սա չեմ պնդում, սա իմ տարբերակն է:

 

-Պարոն Քոչարյան, այսօր կան ավելի լուրջ հարցեր, որոնց համար կարելի է ակցիաներ կազմակերպել այս պահին ինչ որ մարդկանց հրաժարականը պահանջելու փոխարեն: Օրինակ, գազի և էլեկտրաէներգիայի գների թանկացումը:

 -Դեռ դրան էլ կգանք , երիտասարդներն այդ հարցերին էլ կանդրադառնան:

 

-Եթե այս պահին լինեիք նրանց առաջնորդը, ի՞նչ խորհուրդ կտայիք, ո՞րը պետք է լինի նրանց հաջորդ քայլը:

 - Ես չեմ եղել առաջնորդ ու չէի կարող խորհուրդ տալ, դրա համար էլ առաջնորդ չեմ: Եթե ասեմ, որ չանեն, միանգամից ֆրազա կգա՝ «ծախվեց», դրա համար էլ չեմ ասում: Երեխա են, ինչ որ ձևով այդ էներգիան պետք է դուրս գա նրանց մեջից: