Տրանսպորտի ուղեվարձի  թանկացման դեմ պայքարի, շարժման ակտիվիստների և հետագա հնարավոր քայլերի մասին YerevanNews.am-ը զրուցել է  Մարդու իրավունքների առաջին պաշտպան, «Ընդդեմ իրավական կամայականությունների» ՀԿ-ի գործադիր տնօրեն Լարիսա Ալավերդյանի հետ:

 -Ի՞նչ կարծիք ունեք  տրանսպորտի ուղեվարձի  թանկացման դեմ պայքարի և  շարժման մասնակիցների մասին:

- Ես  ողջունում եմ այսպիսի շարժումները: Առաջին փուլը եղել է  շատ զանգվածային, և անգամ այն դեպքում, երբ միջին սերունդը արդեն «վառված» է  այդ տիպի շարժումներից, ոգևորված են եղել: Պետք  է  խոսել նաև այն խավի մասին,  ովքեր սոցիալապես ապահովված են եղել,  նրանք ովքեր մի քանի օր միացան անվճար մարդկանց տեղափոխելու ակցիային: Դա  դրական ազդեցություն է  ունենում, չնայած դանդաղ է հասարակության մեջ հասունանում:

Քաղաքապետարանը չի կարողանում գրագետ վարվի այպիսի  շարժումների հետ ցույց  է  տալիս, որ իշխանությունն ավելի քիչ է  կայացած, քան` հասարակությունը, որը կայանում է: Հասարակությունը նոր որակ է  ցույց տալիս, իսկ  իշխանությունը` շարունակում է  մնալ հին տեղում: 

-Ուղեվարձի  թանկացման որոշման կասեցման հաջորդ օրն իսկ շարժման ակտիվությունը չմարեց, այլ` բարձրացավ ակցիաների երկրորդ ալիքը:  Ըստ Ձեզ, որքանո՞վ է  ճիշտ նստացույցերի  անցկացումը` պաշտոնյաներին պաշտոնանկ անելու պահանջով:

- Նրանք չբավարարվեցին կիսատ-պռատ հայտարարություններով և իրավական առումով ճշմարիտ պահանջ են դրել: Եվ նրանք հետևողական են իրենց պահանջի կատարման համար և պատրաստ են պայքարել մինչև վերջ: Սրանով ես դիտարկում եմ քաղաքացիական հասարակության կայացումը:

Ճիշտ եմ համարում նաև  նստացույցը որպես գործիք ընտելը, քանի որ իրենք շատ գրագետ են անում, քանի որ  փոքր զանգված են բերում: Եվ համաձայն չեմ վերլուծաբանների այն կարծիքի հետ, թե  թույլ է  շարժումը: Դրա  ձևն է  այդպիսին: Դա «վախտային» ձև է, այսինքն` մի վախտա է  կանգնած, հետո գալիս է  երկրորդը, հետո  գալիս է  երրորդը, կրկնվող  անձերը  դա լիդերներն են: Իրականում առաջին փուլը  հենց պետք է  լիներ այնպիսին ինչպիսին եղել է, երկրորդ փուլը նույնպես  ճիշտ է  ընտրված: Տեսնենք զարգացումները:

-Իսկ  դուք ինչպիսի՞ զարգացումներ եք սպասում:

- Էլի գրագետ եմ համարում այն, որ իրենք չգնացին փակ հանդիպման: Ծուղակներից մեկը այդպիսի դեպքերում հենց փակ հանդիպումներն են: Իրենք պահանջեցին բաց հանդիպում : Ես կարծում եմ, որ երիտասարդները  կկարողանան շարունակել իրենց պայքարը: Ես կոչ եմ անում բոլոր գիտակ մարդկանց  հստակեցնեն իրենց դիրքորոշումները, քանի որ  պահանջի մեջ որևէ  անօրինական բան չա եվ երիտասարդները նպաստում են օրինականության հաստատմանը:

- Շարժման մասնակիցները բազմիցս  հայտարարել են, որ չեն համագործակցելու որևէ  քաղաքական ուժի հետ: Արդյո՞ք ճիշտ եք համարում դա:

- Ես  համաձայն չեմ, որ ասում են կուսակցություններ չլինեն, քանի որ  այն ինչ կատարվում է  հիմա,  նաև քաղաքական ենթատեքստ ունի: Պետք  չէ  դա մերժել: Պետք  չէ  վախենալ, որ ինչ-որ դրվագներում  նման կարծիքներ կլինեն: Այդպիսի վախ կա ` հանկարծ չասեն ուղղորդված: Ով ինչ ուզում է  թող ասի, ես խնդիր ունեմ և պետք է  լուծեմ դա: Խնդիրը  նրա մեջ  չէ, թե  ով ինչ է ասում:

- Այս ամբողջ ընթացքում  նրանք  բազմից  հայտարարել են,  որ խախտվել են իրենց իրավունքները: Ի՞նչ կարծիք կհայտնեք այս և հովանոցի  տեղադրման հարցին:

- Ես ընդհանրապես  Վլադիմիր Գասպարյանից ավելին եմ սպասում: Ես տեսնում եմ այն կադրային փոփոխությունները, այն գործերը, որ նա անում է: Ես  գտնում եմ, որ սա էլ  պետք է  հասնի նրան, քանի որ  այդ հակահովանոցային պայքարը  արդեն տարիների  պատմություն ունի: Արդեն անհարմար է  և պետք է  կողմնորոշվել: Թող նա պատասխանի ինչու չի ցանկանում հստակություն մտցնել  այդ հարցում: Նա պետք է  ավելի «կոնֆորտային» իրավիճակ ստեղծի  պայքարողների համար:  

- Ակտիվիսների կողմից հաճախ են հնչում  տարբեր վիրավորական արտահայտություններ: ԸՆդունում ե՞ք նրանց նման պահվածքը:

- Ես ընդհանրապես  դեմ եմ արժանապատվությանը  վիրավորող  որևէ  մի բանի` խոսք, միտք, գործողություն: Ես կցանկանայի, որ բոլորը նաև իրավիճակը հասկանան: Ակտիվիստների հանդեպ  կոշտ են վերաբերվում և այն, որ պատասխանը միայն խոսքով են ստանում, դա էլ պետք է  մի ազդակ լինի: Ես կոչ եմ անում երիտասարդներին լինել սառնասիրտ և քաղաքակիրթ և նման կերպ արձագանքել ցանկացած  պահվածքի: Ես համաձայն չեմ կոպտության ոչ մեկի կողմից:

- Նստացույց  հայտարարած  ակտիվիստները նաև նշել են, որ պատրաստ են դիմել նաև պայքարի այլ միջոցների` ընդհուպ մինչև հացադուլ: Ճիշտ կհամարե՞ք դա:

- Ես հացադուլի դեմ եմ: Դեմ եմ քաղաքական հացադուլներին, քանի որ դրանք ազդեցիկ չեն այլ` հյուծող են և հիասթափեցնող, որովհետև  հացադուլը որպես  գործիք  զգայուն իշխանության համար է, այդ պատճառով ես դեմ եմ: Ես կարծում եմ նստացույցը պետք  է  շարունակվի, պետք է  մեծանա ընդգրկումը, պահանջները կարող են նաև վեր բարձրացնել: Այսինքն` ընդլայնման կողմանկից եմ: ՈՒրախ կլինեմ, եթե նրանք կարողանան այդ պայքարը պահել: Հացադուլը անիմաստ է  ամեն դեպքում:

 

Հարցազրույցը  վարեց` Նաիրա Հովհաննիսյանը