Վերջերս Lucy զոնդը թռավ իր առաջին աստերոիդի՝ Դինքինեշ-ի կողքով, սակայն դրանից հետո մեկը մյուսի հետևից անակնկալ տեղեկություններ են ստացվում Դինքինեշի մասին։ Նախ պարզվեց, որ այն երկակի աստերոիդ է և ունի համեմատաբար փոքր բնական արբանյակ: Հիմա էլ պարզվում է, որ այդ արբանյակն իր հերթին ունի մեկ այլ արբանյակ, այսինքն՝ Դինքինեշը ոչ թե երկակի, այլ եռակի աստերոիդ է, տեղեկացնում է Space.com-ը։
Դինքինեշ աստերոիդը Lucy զոնդի ինժեներական թիրախը դարձավ դեպի Յուպիտերի տրոյական աստերոիդներ ճանապարհին: NASA-ի թիմը փոքր-ինչ փոփոխել էր զոնդի երթուղին, որպեսզի այն հնարավորինս մոտ թռչի Դինքինեշին: Դա նպատակ ուներ փորձարկել զոնդի գիտական գործիքները և տվյալների հավաքման աշխատանքի ավտոմատացումը: Զոնդը հսկայական արագությամբ կանցնի Յուպիտերի ուղեծրի թիրախային աստերոիդների կողքով և տվյալներ հավաքելու համար կունենա ընդամենը րոպեներ: Երկրորդ փորձի հնարավորություն չի լինելու։
NASA-ն դեռ չի զեկուցել զոնդի գիտական համակարգերի աշխատանքի մասին, սակայն կիսվել է բարձր լուծաչափի տեսախցիկների պատկերներով, որոնք լի են անակնկալներով։ Աստերոիդին մոտենալու ժամանակ պարզվել է (նվազագույն մոտեցումը եղել է 425 կմ), որ 790 մետրանոց Դինքինեշ աստերոիդն ունի 220 մետրանոց փոքրիկ արբանյակ, այսինքն՝ այն կրկնակի համակարգ է։ Տասներեք վայրկյան ընդմիջումներով արված լուսանկարների շարքը ցույց է տալիս, որ փոքր մարմինը պտտվում է մեծ մարմնի շուրջ:
Դա ինքնին զարմանալի էր, սակայն երբ զոնդը նկարել է ևս հինգ րոպե անց՝ թռչելով աստերոիդից ավելի հեռու, գիտնականները էլ ավելի են զարմացել, քանի որ պարզվել է, որ 220 մետրանոց փոքրիկ աստերոիդն իր հերթին ունի իր բնական արբանյակը: «Մենք երբեք այսքան տարօրինակ բան չէինք կասկածում»,- խոստովանել են NASA-ի փորձագետները։
«Սա առնվազն տարակուսելի է,- ասել է Lucy առաքելության գլխավոր գիտնական Հալ Լևիսոնը Հարավարևմտյան հետազոտական ինստիտուտից,- Ես երբեք չէի սպասի, որ համակարգը այսպիսի տեսք կունենա։ Մասնավորապես, ես չեմ հասկանում, թե ինչու են արբանյակի երկու բաղադրիչները նույն չափի: Գիտական հանրությունը շահագրգռված կլինի հասկանալ սա»։
NASA-ն օբյեկտի վերաբերյալ լրացուցիչ տվյալներ կտրամադրի մի փոքր ավելի ուշ, երբ ավարտվի զոնդից ստացված տվյալների մշակումը։ Զոնդը կմոտենա Յուպիտերի տրոյական աստերոիդներին 2027-ին և կավարտի իր թռիչքները 2033-ին։
«Նոայի» անսպասելի պարտությունը Գյումրիում 
