«Արցախում զոհված Արտաշես Կորյունի Ջանիբեկյանը 35 տարեկան էր, ամուսնացած, ունի 2 աղջիկ՝ 2 և 5 տարեկան, տղան էլ դեկտեմբերին կծնվի»,- 168.am-ի հետ զրույցում ասաց Գեղարքունիքի մարզի Այրք համայնքի ղեկավար Արտյոմ Շաբոյանը:
«Արտաշեսը ծնողներ ունի, ունի նաև իրենից 2-3 տարով փոքր 2 եղբայր, ինքը մեծն էր, եղբայրներից մեկն էլ է կռվի դաշտում եղել, միասին չեն եղել, բայց նույն ուղղության վրա, եղբայրն էլ ոտքից է վիրավորվել: Արտաշեսը շատ լավ, աշխույժ տղա էր, այս օրերին էլ շատ վիրավոր տղերքի է օգնել, մի 20 վիրավորի միայն ինքն է իջեցրել դիրքերից, լավ կռիվ է տվել, նաև քառօրյայի մասնակից էր»,- ասաց նա:
Շաբոյանի բնութագրմամբ՝ Արտաշեսը շատ համեստ էր, աշխատող, բոլորին հասնող: Բանակից զորացրվելուց մի քանի տարի հետո որոշեց, որ պետք է պայմանագրային դառնա, և արդեն 6-7 տարի առաջ ծառայության էր անցել հայոց բանակում:
Համայնքի ղեկավարն ասաց նաև՝ գյուղից մեկ հոգի էլ է վիրավորվել, որին այդ պահին օգնության է հասել Արտաշեսը.
«Ամսի 29-ին է վիրավորվել, ու հենց Արտաշեսն է իրեն իջեցրել պոստից»:
Այն պահին, երբ համայնքի ղեկավարը մեզ պատմում էր Արտաշեսի մասին, տեղի էր ունենում վերջինի հուղարկավորության արարողությունը:
Նիկոլ Փաշինյանը պատմել է, թե ինչու է որոշել սափրվել 
