Հուլիսի 29-ի գիշերը ուկրաինական անօդաչու սարքերը հարձակվել են Ռոստովի մարզի Սալսկ քաղաքի վրա, հայտնել է մարզի ղեկավարի պաշտոնակատար Յուրի Սլյուսարը։ Նրա տվյալներով՝ հարձակման թիրախը եղել է երկաթուղային կայանը, որտեղ հարձակումը հետ մղելու արդյունքում հրդեհ է բռնկվել։ «Նախնական տվյալներով՝ մարդկանց շրջանում զոհեր և վիրավորներ չկան։ Հրդեհաշիջման աշխատանքներին ներգրավված է 45 մարդ և 12 միավոր տեխնիկա», - գրել է Սլյուսարը Telegram-ի իր ալիքում։ Բացի այդ, Օստրովսկի փողոցում վնասվել է մի ավտոմեքենա, իսկ դրանում գտնվող վարորդը մահացել է։ Զոհվածի ինքնությունը պարզվում է, հավելել է Սլյուսարը։
Ռուսական երկաթուղիները հայտնել են Սալսկ կայարանի միջով գնացքների երթևեկության դադարեցման մասին։ «ԱԹՍ-ի բեկորների անկման հետևանքով խախտվել է կոնտակտային ցանցի աշխատանքը։ Երկաթուղայինները հնարավոր ամեն ինչ անում են ուղևորատար գնացքների ուշացումները կրճատելու համար», - նշել են պետական ընկերությունում։ Նրանց տվյալներով՝ հարձակման հետևանքով վնասվել է Նովոկուզնեցկ - Կիսլովոդսկ № 59 գնացքի երկու վագոնի ապակեպատումը։ Ուղևորները տարհանվել են, տուժածներ չկան։ Բացի այդ, կայանած բեռնատար գնացք է այրվել, հրդեհը մարելու համար ուղարկվել է հրշեջ գնացք։ Հյուսիսկովկասյան երկաթուղին (ՀԿԵ) հստակեցրել է, որ հարձակումից հետո ավելի քան չորս ժամով կուշանան 9 ուղևորատար գնացքներ։
Սա վերջին մեկ ամսվա ընթացքում Ռոստովի մարզի երկաթուղային ենթակառուցվածքների վրա ուկրաինական անօդաչու թռչող սարքերի կողմից արդեն չորրորդ հարձակումն է։
«Եղել են ինձ ճնշելու փորձեր, բայց ռեկտորը հասկացել է, որ դա վատ հետեւանքներ կունենա ԵՊՀ–ի համար». Արայիկ Հարությունյան 
