«Հայկական ժամանակ» թերթը գրում է. «ՀՀ տնտեսական մրցակցության պետական հանձնաժողովի նախագահ Արտակ Շաբոյանը մեր թղթակցի հետ զրույցում անսպասելի բացահայտում է արել։ Նա հայտնել է, որ Հայաստան շաքարավազ չի ներկրվում, այլ ներկրվում է միայն հումք՝ շաքարեղեգ։

Համենայնդեպս, ըստ պրն. Շաբոյանի, իրենց ստացած փաստաթղթերի եւ ուսումնասիրությունների համաձայն, Հայաստանում սպառվող ամբողջ շաքարավազը արտադրվում է Հայաստանում՝ Սամվել Ալեքսանյանին պատկանող Ախուրյանի շաքարի գործարանում, որը միակն է ՀՀ-ում։

Սա, ըստ էության, սենսացիոն հայտարարություն է, եւ ահա թե ինչու, Հայաստան ներկրվող պատրաստի շաքարը ենթակա է մաքսազերծման, իսկ հումքը՝ ոչ։ Սրանից կարելի է ենթադրել, որ Հայաստան ներկրվող պատրաստի շաքարը ձեւակերպվում է որպես հումք եւ չի մաքսազերծվում, իսկ դրա պատճառով ՀՀ պետբյուջեն հսկայական գումարներ է կորցնում։

Իրականում Հայաստան ներկրվում է պատրաստի շաքարավազ՝ ըստ այլ պաշտոնական տեղեկանքների, տարեկան մոտ 80 հազար տոննա։ Իսկ ՏՄՊՊՀ-ն իրականությունը պարզելու փոխարեն ներկայումս զբաղված է հեռուստատեսությամբ «հասարակական իրազեկման» տեսահոլովակներ «ֆռռցնելով»»։


Առավել մանրամասն` թերթի այսօրվա համարում