Վերջին օրերին մեր երկրում քննարկման, նույնիսկ շահարկման առարկա է դարձել Ստամբուլի «Գանաթասարայ» ակումբի Գյումրիի «Շիրակի» 17-ամյա կիսապաշտպան Վահան Բիչախչյանի նկատմամբ ցուցաբերած հետաքրքրությունը:

Մասնավորապես, թուրքական մի շարք լրատվամիջոցներ գրել էին որ «Գալաթասարայի» սկաուտները երկար ժամանակ փոխարինող են փնտրել պորտուգալացի խաղացող Բրումային: Թեկնածուների շարքում ակումբի ղեկավարությանը ներկայացվել է մասնավորապես Վահան Բիչախչյանը:

Թուրքական լրատվամիջոցները նկատել են, որ Բիչախչյանը խոստումնալից ապագա ունեցող երիտասարդ է, որին «Գալաթասարայի» սկաուտները բացահայտել են Եվրոպայի` մինչև 19 տարեկանների առաջնության որակավորման փուլի խաղերի ժամանակ: Սկաուտները հոկտեմբերից հետևում են նրա խաղերին: Թուրքական կողմը Բիչախչյանի խաղաոճը նմանեցրել է բելգիացի Քևին դե Բրույնեի ոճին: Միանգամայն նորմալ երևույթ, որը սակայն հայ երկրպագուների նույնիսկ լրատվամիջոցների շրջանում ոչ ադեկվատ գնահատականի արժանացավ:

Մասնավորապես, մի քանի ԶԼՄ-ների դիտարկման համաձայն թուրքական ակումբը ցանկանում է Բիչախչյանին իր կազմում տեսնել որպեսզի խորտակի նրա ապագան: Որպես նախադեպ օրինակ էր բերվել Ստամբումի մեկ այլ թիմում՝ «Բեշիկթաշում» հանդես եկող Արաս Օզբիլիսը: Հայաստանցի ֆուտբոլի որոշ մասնագետներ այն կարծիքին են, որ «Բեշիկթաշը» նպատակաուղված մոտ 1.5 միլիոն եվրո է Մոսկվայի «Սպարտակին» վճարել Օզբիլիսի համար որպեսզի «փչացնի» նրա ապագան:

Նշենք, որ «Բեշիկթաշում» Հայաստանի ազգային հավաքականի կիսապաշտպանը տևական ժամանակ չի կարողանում ամրապնդվել հիմնական կազմում: Օզբիլիսի նախ վարձավճարով տրամադրվեց իսպանական «Ռայո Վալեկանոյին», իսկ այժմ ելույթ է ունենում «Բեշիկթաշի» երիտասարդական թիմում: Ի՞նչ է, «Բեշիկթաշ» ակումբը հանուն հայ ֆուտբոլիստին «փչացնելու» սեփական «գրպանից» 1.5 միլիոն եվրո է ծախսել և մինչ օրս շարունակում է Օզբիլիսին աշխատավարձ տա՞լ: Այժմ հերթը Բիչախչյանինն է: Հիվանդագին այս դիտարկման համաձայն թուրքական ակումբներն «էլ դարդ ու ցավ չունեն» և միլիոններ են ծախսում հայական ֆուտբոլին վնաս տալու համար: Եթե «Բեշիկթաշը» նման նպատակ ունենար ապա 1.5 միլիոնով կգներ Հայաստանի ազգային հավաքական կես կազմը և այդ ֆուտբոլիստներին կզրկեր խաղադաշտ դուրս գալու հնարավորությունից: Աբսուրդային է, որ նման մեկնաբանություններ և դիտարկումներ հնչում են մի երկրում, որտեղ ազգաբնակչության զգալի մասը գնում է թուրքական ապրանքներ և ադրբեջանական խնձոր: Վստահ ենք, եթե Օզբիլիսը իրեն պատշաճ կերպով դրսևորեր «Բեշիկթաշում» ապա անպայման հանդես կգար այս թիմի հիմնական կազմում:

Նշենք, որ բուռն քննարկումներից հետո պաշտոնական հայտարարությամբ հանդես եկավ նաև «Շիրակ» ֆուտբոլային ակումբը: «Տեղեկություններ են տարածվել, որ Թուրքական «Գալաթասարայը» հետաքրքրված է «Շիրակի» 17-ամյա ֆուտբոլիստ Վահան Բիչախչյանով։ Պաշտոնապես տեղեկացնում ենք, որ «Շիրակ» ֆուտբոլային ակումբը չի ստացել ոչ մի առաջարկ թուրքական ակումբից, և նույնիսկ ստանալու դեպքում և Վահան Բիչախչյանը, և ակումբի ղեկավարությունը չեն համաձայնվի, որպեսզի երիտասարդ ֆուտբոլիստը տեղափոխվի Թուրքիա»,- ասված է հայտարարության մեջ։

Նշենք, որ Բիչախչյանի ծառայություններով հետաքրքրված են նաև Մոսկվայի ԲԿՄԱ-ն, ինչպես նաև իտալական «Ֆիորենտինան»: Այս թիմերում մեր ֆուտբոլիստն արդեն փորձաշրջան է անցել: Բիչախչյանը այլ թիմի հետ պայմանագիր կկարողանա կնքել առաջիկա ամռանը, երբ կդառնա 18 տարեկան: