Մայիսի 28-ին Սերժ Սարգսյանը Հանրապետության տոնի առթիվ պետական պարգևներ և կոչումներ է շնորհել մի խումբ անձանց, այդ թվում` երգիչ Ռազմիկ Ամյանին: Նրան շնորհվել է վաստակավոր արտիստի պատվավոր կոչում՝ երաժշտարվեստի բնագավառում ունեցած վաստակի համար։

Ժամեր անց երգիչը գրառում կատարեց իր ֆեյսբուքյան էջում, որով շնորհակալություն էր հայտնել նախագահին:

Գրառումը լայն արձագանք ստացավ և բուռն քննադատությունների արժանացավ, քանի որ երգիչն այն սկզբում գրել էր հայատառ, իսկ հետո նույն հայերեն տեքստը գրել է նաև լատինատառ:

Այն, որ Ռազմիկն իր ֆեյսբուքյան ստատուսները հենց այս կերպ է մակագրում արդեն երկար տարիներ, փաստ է, ու զարմանալին այն է, որ համացանցային որոշ օգտատերեր միայն հիմա են դա նկատել ու այսպիսով երգչի քայլը դարձրել հանրային քննարկման թեմա: Ինչպե՞ս է այս ամենին վերաբերվում անձամբ երգիչն ու ինչո՞ւ է նա ստատուսը երկու տարբերակով գրել, այդպես էլ չհաջողվեց պարզել, քանի որ երգչի հետ կապ հաստատել չստացվեց, սակայն BlogNews.am-ը կապ է հաստատել Ռազմիկ Ամյանի պրոդյուսեր Արմին Մովսիսյանի հետ, ով այսպես արձագանքեց հարցադրմանը. «Ես բոլորովին տեղյակ չեմ, թե ինչի մասին է խոսքը: Ոչ մի աղմուկ չեմ նկատել ոչ մի տեղ, իսկ եթե կան մի երկու այցելություն ունեցող ինչ-որ ցածրորակ կայքեր, որոնք ինչ-որ բաներ են գրել, ապա ասեմ, որ ես նման ստից կայքերի չեմ հետևում ու չգիտեմ՝ ինչ են գրում: Ոչ մի վատ արձագանք մեզ չի հանդիպել, միայն լավ կարծիքներ եմ լսել, իսկ վատ բան ոչ մեկից չեմ լսել ու չեմ կարդացել»,- իր խոսքը եզրափակեց Ռազմիկ Ամյանի պրոդյուսեր Արմին Մովսիսյանը:

Ի դեպ, քանի որ Ռազմիկ Ամյանի լատինատառ հայալեզու տեքստը այսքան բուռն քննադատության է արժանացել, պետք է նշել, որ ընթերցողների ու հետևորդների հետ այս աշխատելաոճը շատ հայ հայտնիներ են կիրառում, մասնավորապես՝ երգիչ Էրիկը, Սիրուշոն, Անդրեն, Արաբո Իսպիրյանը և բազմաթիվ այլ հայ հայտնիներ:

Նյութի աղբյուրը՝ BlogNews.am