«Վերջին օրերին մամուլի ուշադրության կենտրո­նում է հայտնվել Հայ Հե­ղափոխական դաշնակ­ցությունը: Լրատվամիջոց­ներում քննարկվում է կու­սակցությունում առկա լարված մթնոլորտն ու նշ­վում է, որ ՀՅԴ-ն պա­ռակտման եզրին է: Ստեղծված իրավիճակը մեկնաբանելով, ՀՅԴ Բյուրոյի ներկայացուցիչ Հրանտ Մարգարյանը բոլո­րի համար անակնկալ հայտարարեց, որ վարչապետ Տիգրան Սարգսյանը պատերազմ է հայտարարել ՀՅԴ-ին:

Պարզվում է ՀՅԴ-ի շուրջ այս աժիոտաժը կապ ունի հայտնի «օֆշորային սկանդալի» հետ»,- գրում է «Հայկական ժամանակ» օրաթերթը և շարունակում. «Մեր տեղեկություններով՝ մոտ մեկ շաբաթ առաջ Տիգրան Սարգսյանի աշխատակազմից զանգահարել են «Երկիր մեդիա» հեռուստաընկերություն, որը, ինչպես հայտնի է, գտնվում է Դաշնակցության վերահսկողության տակ և խնդրել, որ ՀՅԴ վերահսկողության տակ գտնվող լրատվամիջոցները չշոշափեն Տիգրան Սարգսյանի անվան հետ ուղղակի կապ ունեցող օֆշորային հայտնի պատմությունը:

Նշված լրատվամիջոցներն այս ընթացքում բավականին հետևողականորեն և անկաշկանդ են լուսաբանել այդ պատմությունը: Իսկ երբ ՀՅԴ ԳՄ ներկայացուցիչ, ԱԺ ՀՅԴ խմբակցության քարտուղար Աղվան Վարդանյանն արել է իր վերջին հայտարարությունը, վարչապետի «համբերության բաժակը լցվել է»: Հիշեցնենք, Վարդանյանն ասել էր, թե վարչապետի ամանակավոր հրաժարականը կնպաստի օֆշորային սկանդալի բացահայտմանը: Տիգրան Սարգսյանը, ըստ մեր տեղեկությունների, բավականին ծանր է տանում օֆշորային այս պատմությունը և ամեն ջանք գործադրում է, որպեսզի հնարավորինս քիչ լրատվամիջոցներ խոսեն այդ մասին: «Երկիր մեդիայի» դեմքում, սակայն, վարչապետը հաջողության չի հասել:

Նրան կտրուկ մերժել են: Եվ հենց այդտեղ էլ Տիգրան Սարգսյանը հայտարարել է պատերազմի մեկնարկի մասին»:

Ամբողջական հոդվածը կարող եք կարդալ «ՀԺ»-ի այսօրվա համարում: