Երեւանի ավագանու «Բարեւ Երեւան» խմբակցության ղեկավար Անահիտ Բախշյանը երեկ հարցում է ուղարկել քաղաքապետ Տարոն Մարգարյանին՝ կապված ներքաղաքային երթուղիների խնդրի հետ:

Բախշյանը մասնավորապես գրել է.

«Գաղտնիք չէ, որ Երեւանում կան շահութաբեր ու ոչ շահութաբեր երթուղիներ: Դրա փաստացի վկայությունն է այն ակնհայտ իրողությունր, որ ինչպես Երեւանի քաղաքապետարանն է պաշտոնապես հայտարարում, «30.07.2013թ. դրությամբ` թվով 23 ավտոբուսային (հ.հ. 2, 6, 10, 19, 21, 25, 26, 29, 37, 39, 42, 49, 50, 52, 56, 60, 61, 62, 63, 64, 66, 67, 68) եւ թվով 1 միկրոավտոբուսային (հ.77) երթուղիների համար մրցույթներ չեն անցկացվել»։ Ի հավելումն դրա՝ ս.թ. օգոստոս ամսվա ընթացքում այդ 23 երթուղիների  համար հայտարարված 2 մրցույթներն այդպես էլ չեն կայանում: Խնդրո առնչությամբ խնդրում եմ տրամադրել  հետեւյալ տեղեկատվութունը.

1. Ո՞րն է ձեր պաշտոնական բացատրությունը այն իրողության, որ մինչեւ այժմ վերոնշյալ 23 երթուղիները սպասարկող կազմակերպություններ չկան:

2. Որքան էլ որ «Ավտոմոբիլային տրանսպորտի մասին» Հայաստանի Հանրապետության օրենքի 10-րդ հոդվածի 2-րդ մասի համաձայն «Երեւան քաղաքի ներքաղաքային ավտոբուսային կանոնավոր փոխադրումների երթուղային ցանցը կազմակերպում է Երեւանի քաղաքապետը», այդուհանդերձ, ո՞ր մասնագիտացված կազմակերպությունն է նրան օգնել մայրաքաղաքում կանոնավոր ուղեւորափոխադրումների երթուղիների  ցանցի մշակման հարցում:

3. Ե՞րբ է մշակվել եւ Երեւանի քաղաքապետի կողմից հաստատվել Երեւան քաղաքի ներքաղաքային ավտոբուսային կանոնավոր փոխադրումների երթուղային ցանցը (ավտոբուսային եւ միկրոավտոբուսային):

4. Այս տարիների ընթացքում ի՞նչ փոփոխություններ են կատարվել երթուղային ցանցում եւ ո՞ր համարի երթուղիների պարագայում, ըստ այդմ՝ ո՞ր ենթուղային գծերն են տարիների ընթացքում մնացել անփոփոխ, եւ ինչպե՞ս են հիմնավորվել կատարված փոփոխությունները:

5. Պահպանվո՞ւմ է արդյոք երթուղիների գծանշման գիտականությունը, ի՞նչ մեթոդաբանություն է կիրառվել Երեւանի համար:

6. Ինչպե՞ս է որոշվում երթուղու նպատակահարմարությունը՝ երեւանցուն առաջարկվող տրանսպորտային ծառայությունը պատշաճ իրականացնելու համար»: