Ռուսաստանի նախագահ Վլադիմիր Պուտինը ստորագրել է օրենք Բաց երկնքի պայմանագրի (ԲԵՊ) չեղարկման մասին։ Փաստաթուղթը հրապարակվել է երկուշաբթի, իրավական տեղեկատվության պաշտոնական պորտալում։

Մայիսի 19-ի օրենքը միաձայն ընդունվել է Պետդումայում։ Սկզբում նախատեսվում էր, որ Դաշնության խորհուրդը կդիտարկի փաստաթուղթը այդ նույն օրը, բայց չեղարկման քննարկումը տեղափոխվեց։ Խորհրդարանի վերին պալատի նիստում հունիսի 2-ին սենատորները միաձայն հավանություն տվեցին օրենքին. կողմ քվեարկեց 152 մարդ։


Մայիսի 27-ին ԱՄՆ պետքարտուղարի առաջին տեղակալ Ուենդի Շերմանը տեղեկացրել էր ՌԴ ԱԳ փոխնախարար Սերգեյ Ռյաբկովին Վաշինգտոնի՝ ԲԵՊ չվերադառնալու որոշման մասին։ Ըստ Ռյաբկովի՝ Մոսկվան չի պատրաստվում հօգուտ Վաշինգտոնի փոխել Բաց երկնքի պայմանագրից դուրս գալու իր դիրքորոշումը։

Անցած տարվա նոյեմբերին ԱՄՆ-ը պաշտոնապես դուրս եկավ համաձայնագրից՝ իր որոշումը բացատրելով նրանով, որ ՌԴ-ն, իբր, խախտել է ԲԵՊ մի շարք դրույթներ։ Հունվարին Ռուսաստանի ԱԳՆ-ն հայտարարեց պայմանագրից դուրս գալու ուղղությամբ ներպետական ընթացակարգերի գործարկման մասին, այնուհետեւ ՌԴ նախագահը Պետդումա մտցրեց ԲԵՑ չեղարկման մասին օրինագիծը։ Վերջին ժամանակներս Մոսկվայում քանիցս հայտարարել են այն մասին, որ համաձայնագրի պահպանման հնարավորությունը նվազագույնն է, իսկ չեղարկման գործընթացը կտեւի մի քանի շաբաթ։

Պայմանագիրը մասնակից պետություններին իրավունք է տալիս կատարել թռիչքներ մեկը մյուսի ցանկացած տարածքից՝ ռազմական գործունեությանը հետեւելու համար, դրանում դիտորդական առաքելությունների համաձայնեցված եւ պայմանավորված քվոտաներին համապատասխան։ Այն նաեւ կանոնակարգում է թռիչքները, սահմանում պայմանագրի կատարման վերահսկման մեխանիզմը, պարունակում է պահանջներ ինքնաթիռին, անձնակազմի եւ դիտասարքերի տեխնիկական պարամետրերի սահմանափակումներ։