Եթե ճիշտ վերլուծել իրավիճակը և եթե դեպքերը զարգանան իմ պատկերացումներին համապատասխան, ապա 3-4 տարուց հետո Վրաստանը կարող է դառնալ ՆԱՏՈ-ի անդամ: Այս մասին հայտարարել է Վրաստանի վարչապետ Բիձինա Իվանիշվիլին Bloomberg-ին տված բացառիկ հարցազրույցի ժամանակ:
Իվանիշվիլին ասել է, որ «այժմ դժվար է նշել է Վրաստանի` ՆԱՏՈ-ին անդամագրվելու հստակ տարեթիվը», սակայն իրավիճակի վերլուծությունը ցույց է տալիս, որ եթե ամեն ինչ հաջող ընթանա, ապա հույս կա, որ 3-4 տարուց հետո Վրաստանը կդառնա ՆԱՏՈ-ի անդամ:
Ամերիկյան պարբերականին տված հարցազրույցի ժամանակ Վրաստանի վարչապետը կենսական կարևոր է համարել երկրի համար Ռուսաստանի հետ հարաբերությունների կարգավորումը: Իվանիշվիլին նշել է, որ Ռուսաստանի հետ հարաբերությունների կարգավորումը շատ կարևոր է Վրաստանում քաղաքական կայունության և տնտեսության զարգացման համար: «Հաշվի առնելով ՌԴ-ի հետ հարաբերությունների կարգավորման կարևորությունն ու արժեքը Վրաստանի կառավարությունը անում է ամեն ինչ այդ նպատակին հասնելու համար»,- նշել է նա:
Վրաստանի վարչապետը կրկին անգամ հաստատել է ընթացիկ տարվա դեկտեմբերի վերջին քաղաքականության հեռանալու իր մտադրությունը: «Մտածում եմ` ես կհեռանամ մինչև նոր տարին և կշարունակեմ ակտիվ հասարակական գործունեությունը: Ըստ իս մեր խնդիրը ոչ թե կառավարության, այլ հասարակության մեջ է, որը շատ քիչ փորձ ունի և ցածր քաղաքական մշակույթի կրող է: Ես կանեմ ամեն ինչ այդ մակարդակի բարձրացման համար»,- խոստացել է կառավարության ղեկավարը: