Դերասանուհի Մարիամ Ալեքսանյանը նոր գրառում է արել՝ անդրադառնալով իր հասցեին հնչած խոսքերին ու նշել՝ անկախ բոլոր հանգամանքներից՝ պետք է ուժեղ լինի։ Դերասանուհին ապրիլին կորցրել է հորը։

«Մեր ցավը իմն ու ընտանիքինս է։ Տաղտկալի, նողկալի, չարացած բառեր չեմ ասի, քանի որ իմ անձին հարիր չէ պատասխանել Ձեզ ձեր լեզվով։ Իմ սուգը թողեք ինձ ու իմ ընտանիքին։ Սգացեք ձեր ուղեղի ոչնչացման համար, կամ ավելի ճիշտ կաղոթեմ ձեզ համար, որ չխցկվեք ուրիշի անձնական տարածք, որ ոչ խանգարեք, ոչ էլ խանգարվեք։ Ես պարտավոր եմ աշխատել, շատ ավելի շատ, քան առաջ եւ անկախ բոլոր հանգամանքներից՝ ես պետք է ուժեղ լինեմ, քանի որ ունեմ ընտանիք, ում փորձում եմ ուժ տալ։ Թե ինչ կկատարի իմ սոցիալական էջերում կամ սենյակում՝ գլուխս բարձին դրած, թողեք դա որոշեմ ես։

 

Դուք չեք սիրում, երբ մարդ ոտքի է կանգնում։ Դուք սիրում եք մարդուն տեսնել տապալված, ոչնչացված, այդպես ինքնաբավ եք ու երջանիկ։ Ես ուղղակի տանել չեմ կարողանում, երբ խղճում են, բայց բայց ավելի անտանելի է, երբ քեզ թելադրում են՝ ինչպես սգալ, ինչպես ապրել։ Ամեն ինչից զատ՝ ես ձեզ նույն ցավը չեմ ցանկանում եւ երբեք էլ չեմ ցանկանա։ Բայց բոլորիս կյանքում այդ էտապը մի օր գալու է, դա անխուսափելի է։

Դուք ո՞վ եք, որ որոշեք ուրիշի ճիշտ քայլերի հերթականությունը։ Ես չեմ փորձի փոխել ձեզ, որպես կանոն՝ մարդիկ չեն էլ փոխվում, բայց խորհուրդ՝ մի խցկվեք, մի քարկոծեք, որ չքարկոծվեք։

Չեմ նեղսրտում, այսպիսի իրադարձությունները չեն կարող ինձ ցավեցնել, քանի որ հանրային լինելը հասանելի է դարձնում հասարակության լայն շերտերի, անհասանելի մնալ չես կարող։ Ես զգաստ մարդ եմ, մնալու եմ միշտ զգոն, որովհետեւ ինձ այդպես են սովորեցրել»,- գրել է Մարիամը։