Ուրալի դաշնային օկրուգում Ռուսաստանի նախագահի ներկայացուցիչ Վլադիմիր Յակուշեւը հայտնել է, որ Ղազախստանը պետք է համաձայնեցներ ջրահեռացումը ջրամբարներից Ռուսաստանի հետ։ Այս մասին տեղեկացրել է Orda.kz-ը՝ հղում կատարելով ՌԲԿ եթերին։

Յակուշեւը հայտնել է, որ Կուրգանի եւ Տյումենի մարզերում «մեծ ջրի» մակարդակի վրա ազդել է ջրի բացթողումը ջրամբարներից, որոնք գտնվում են հարեւան Ղազախստանում։

«Պետք է հաշվի առնել հարեւան Ղազախստանի տարածքում գտնվող ջրամբարները։ Եթե մեզ մոտ բավական շատ ձյուն է եղել, ավելի լավ կլիներ համաձայնեցնել ջրի բացթողումը։ Եթե համագործակցեինք, նման խնդիրներից կարելի կլիներ խուսափել»,- ասել է պաշտոնյան։

Մարտին RuTube ռուսական պլատֆորմում ներկայացվել էր ֆիլմ՝ «Թագավորի անձնական թշնամին. ղազախստանյան բեկվածք», որի հեղինակը ՌԴ ԿԳԲ նախկին աշխատակից եւ Պետդումայի պատգամավոր Անդրեյ Լուգովոյն է, որին կասկածում են Լոնդոնում Ալեքսանդր Լիտվինենկոյին պոլոնիումով թունավորելու մեջ։ Իր ֆիլմում քաղաքական գործիչը Ղազախստանը համեմատել է Ուկրաինայի հետ եւ հայտնել, որ իրականում հանրապետությունը «կառավարվում է անգլոսաքսերի կողմից»։ Նրա խոսքով՝ Ղազախստանը երկիր է, որտեղ «ավելի հաճախ է ռուսատյացություն դրսեւորվում»։

Սա կրեմլամետ քարոզչության առաջին հարձակումը չէ Ղազախստանի հանդեպ, նշում է «Իսկական ժամանակը»։ Աստանայի «ռուսատյացության» թեման մշտապես բարձրացվում է Ռուսաստանի պետական հեռուստաալիքներում։ Երբեմն անգամ բանը հասնում է «Հյուսիսային Ղազախստանի պատմական հողերը Ռուսաստանի վերադարձնելու» կոչերին։

Ղազախստանի նախագահ Կասիմ-Ժոմարտ Տոկաեւը ապրիլի 6-ին դիմել է ժողովրդին՝ հեղեղումների հետ կապված ծանր իրավիճակի առիթով։ Արտակարգ դրություն է հայտարարվել երկրի 17 մարզերից 10-ում։

Ուժեղ հեղեղումներ են նաեւ Ղազախստանի հարեւան ռուսական մարզերում։ Այստեղ խորտակվել է ամբարտակը Ուրալ գետի վրա։ Հայտնի է զոհերի մասին։