Հայկական արմատներով ամերիկացու բարը ճանաչվել է լավագույնը ԱՄՆ-ում

Այս տարի թունդ ալկոհոլային խմիչքների համաշխարհային հայտնի Tales of the Cocktail կոնֆերանսը «ԱՄՆ լավագույն կոկտեյլ բար» տիտղոսը շնորհել է Սան Ֆրանցիսկոյի կուլտային Trick Dog բարին, որի վաճառասեղանի հետևում արդեն ավելի քան 12 տարի կանգնած է երազողների, պերֆեկցիոնիստների և, ինչպես պարզվեց, իրենց գործի իսկական վարպետների թիմը։

Բարի հիմնադիրը հայկական արմատներով Ջոշ Հարիսն է, որի հետ NEWS.am STYLE-ին բախտ է վիճակվել անձամբ զրուցել Yerevan Cocktail Week 2025-ի ժամանակ, երբ նա առաջին անգամ այցելել էր իր պատմական հայրենիք։

Ջոշն անկեղծորեն հուզված էր մթնոլորտից ու ջերմությունից, որով իրեն դիմավորել էին, և, թվում է, Հայաստանը գրավել է նրա սիրտը։

Tales of the Cocktail հեղինակավոր մրցանակաբաշխության ժամանակ, որը բարերի ոլորտում իրավամբ համարում են «Օսկար», Trick Dog-ը ստացել է բարձրագույն պարգևը։ Սակայն բարի թիմը դա ընկալում է ոչ թե որպես արդյունք, այլ որպես նոր բարձունք. «Մեզ համար այս մրցանակը այն մասին չէ, որ մենք այս տարի լավագույնն էինք։ Սա ստեղծագործական հնարավորությունների սահմաններում ապրած 12,5 տարվա ճանաչում է։ Սա երախտագիտություն է ազնիվ, անկեղծ հյուրընկալության և մթնոլորտի համար, որն անհնար է կեղծել»։

Գոյության տարիների ընթացքում այստեղ աշխատել են բազմաթիվ անհավանական մարդիկ, ասում է Հարիսը, և նրանցից յուրաքանչյուրը իր մասնիկն է ներդրել հենց այն ֆիրմային «վայբի» մեջ, որի համար Trick Dog-ը սիրում են ողջ Ամերիկայում։

«Այժմ մենք ոչ միայն երկրի լավագույն բարերից ենք։ Մենք նրա պատմության մի մասն ենք։ Եվ մենք պատրաստ ենք կրել այդ պատասխանատվությունը», - իր Instagram-ի էջում կիսվել է Ջոշը։