Մենք կգնանք պարզեցման ճանապարհով ոչ միայն հայ-ադրբեջանական սահմանին, այլև մեր բոլոր սահմանային կետերում, որպեսզի առավելագույնս պարզեցնենք բիզնես միջավայրը՝ արտահանումը, ներմուծումը, տարանցումը։ Այս մասին օգոստոսի 21-ին լրագրողների հետ զրույցում հայտարարել է ՀՀ վարչապետ Նիկոլ Փաշինյանը։


Նա նշել է, որ սա կարևոր է բիզնես գործունեության համար միջավայր ստեղծելու առումով։ Նրա գնահատմամբ՝ այն մեթոդները, որոնց համաձայն անհրաժեշտ է մարդկանց դիպչել և այլն, մի քանի տարի անց կվերանան բոլոր երկրներում, այդ թվում՝ Հայաստանում, և Հայաստանը կգնա պարզեցման ճանապարհով։


Փաշինյանը վստահեցրել է, որ Վաշինգտոնի հռչակագրում հստակ նշված են հինգ սկզբունքներ, որոնց վրա հիմնված է Հայաստանի և Ադրբեջանի միջև համաձայնագիրը՝ տարածքային ամբողջականություն, ինքնիշխանություն, իրավասություն, սահմանների անձեռնմխելիություն և փոխադարձություն։ «Ես իմ ուղերձում ասել եմ, որ այս սկզբունքների շրջանակներում մենք կարող ենք և ի դեպ, «Աշխարհի խաչմերուկ» նախագիծը ներկայացնելիս մենք նաև խոսել ենք այդ սկզբունքների հիման վրա կարգավորումները պարզեցնելու մեր պատրաստակամության մասին», - նշել է կառավարության ղեկավարը։

Նա հավելել է, որ աշխարհի շատ զարգացած երկրներում այլևս գոյություն չունեն մաքսային և սահմանային վերահսկողության այն ձևերը, որոնց Հայաստանում սովոր էին նախորդ տասնամյակներում։ «Մասնավորապես, կենսաչափական անձնագրերի օգտագործման դեպքում գործում են բոլորովին նոր ընթացակարգեր, իսկ թվային տեխնոլոգիաների զարգացման տրամաբանության համաձայն՝ գործում են բոլորովին այլ ընթացակարգեր», - եզրափակել է Փաշինյանը։